काठमाडौं,१२ माघ । नयाँ शक्ति पार्टी, नेपालका संयोजक डाक्टर बाबुराम भट्टराईले जनतामा राजनीतिप्रति वितृष्णा जागेकाले असल राजनीतिबारे बुझाउनुपर्ने आवश्यकता रहेको बताएका छन ।

शनिबार काठमाडौंमा पत्रकार सम्मेलन गरी संयोजक भट्टराईले राजनीतिले देश र समाजको दिशाबोध गर्ने भए पनि भ्रष्टाचार र अनियमितताका घटनाका कारण जनतामा राजनीति र नेताप्रति घृणा बढेको बताए ।

उनले राजनीतिक पार्टीहरु भ्रष्टाचार र अनियमितताको दलदलबाट मुक्त हुनुपर्नेमा जोड दिए । संयोजक भट्टराईले पार्टीले नयाँ शक्ति पार्टीले असल राजनीतिका लागि एक महिने अभियान सञ्चालन गर्ने जानकारी दिए ।

अभियानको क्रममा नागरिकको समस्या बुझेर सडक र सदनबाट आवाज उठाउँदै समाधानका लागि प्रदेश र केन्द्र सरकारमा पहल गर्ने संयोजक भट्टराईले बताएका छन ।

’असल राजनीति र समावेसी विकासका लागि जनसंवादँको नारासहित नयाँ शक्तिले मध्यपहाडी लोकमार्गको पूर्वमा पाँचथरको चिवाभञ्ज्याङदेखि पश्चिममा बैतडीको झुलाघाटसम्म अभियान गर्ने भएको छ । अभियान माघ १५ गतेदेखि फागुन १५ गतेसम्म सञ्चालन हुने जनाइएको छ ।