पोखरा १२ माघ । पूर्व प्रधानमन्त्री तथा नेकपाका वरिष्ठ नेता माधव कुमार नेपालले चिकित्सा विधेयकको विषयमा विपक्षी दल नेपाली कांग्रेसलाई आन्दोलन गरेर समयको बर्वादी नगर्न आग्रह गरेका छन ।

यतिवेला मुलुकमा विकासको काममा जुट्नुपर्ने बेलामा सडक आन्दोलनमा भन्दापनि नमिलेको कुरा र नसमेटिएका कुराहरुलाई छलफल बाट सुल्झाएर मुलुकको विकासतर्फ कांग्रेस पनि सरकार संग सहकार्य गरेर अगाडी बढ्न नेता नेपालले आग्रह समेत गरेका छन ।

तनहुको कार्यक्रममा सहभागी हुन पोखरा आएका नेता नेपालले नेपाली कांग्रेसले चुनावमा हार भएकाले हतास नभइकन आन्दोलनलाई छोडेर मुलुकको विकासमा अगाडी बढ्न आग्रह गरेका हुन ।

त्यसैगरी नेता नेपालले ३३ किलो सुन, बुढीगण्डकी, वाइडवडी, बलात्कारमा जो कोही आफ्नै पार्टी भित्रै दोषी ठहरिएको खण्डमा आफ्नो पार्टीबाट कुनै छुट नहुने बताए ।

नेता नेपालले पुस मसान्त भित्रमा पार्टी एकीकरणको सम्पूर्ण काम सक्ने भनिएतापनि केही ढिलाई भएको र पार्टीको विधी र विद्यान अनुरुपनै पार्टी एकता हुने भएकाले कोही कसैलाई अफ्ठेरो नहुने गरी नै पार्टी एकता हुने बताए ।

त्यसैगरी पार्टीका प्रवक्ता नारायणकाजी श्रेष्ठले पनि पार्टी एकीकरणको अभियान अब दु्रत गतिमा अगाडी बढ्ने र पार्टीको विधी र विद्यान अनुरुपनै पार्टीको एकता हुने र कोहीलाई पाखा र कोहीलाई काखा नहुने गरी नै पार्टी एकता हुने बताए ।

सांगठनिक एकताको काम अब अगाडी बढ्ने भएकाले जनताको जनादेश अनुरुप नै सरकार गठन भएकाले सरकारलाई प्रभावकारी र परिणाममुखी हुने गरी नै पार्टी पङ्ती अगाडी बढेको श्रेष्ठको भनाइ रहेको थियो ।