नेपालगन्ज,३ पुस ।
राष्ट्रिय प्रजातन्त्र पार्टीका अध्यक्ष कमल थापाले सरकार बनेको एक बर्ष बित्न लाग्दा समेत जनताले परिवर्तनको अनुभुती गर्न नपाएको बताएका छन् ।
प्रधानमन्त्री केपी शर्मा ओली लाचार बन्दा सरकार हरेक क्षेत्रमा असफल बन्दै उनले बताए । पार्टीको प्रदेश नम्बर ५ को प्रशिक्षण तथा सम्मेलनलाई मंगलबार बाँकेको नेपालगन्जमा सम्बोधन गर्दै थापाले दुई तिहाई बहुमतको सरकार हरेक क्षेत्रमा असफल भएको दाबी गरे ।
हिन्दु राष्ट्र र राजसंस्था सहितको लोकतन्त्रको पक्षमा आफ्नो पार्टी रहेको उनले बताए । अध्यक्ष थापाले विगतको चुनावमा एजेण्डाका कारण पार्टीको पराजय नभएको दाबी गरे । उनले तत्कालीन अवस्थामा नेपाली कांग्रेससँगको सहकार्यमा काँग्रेसले इमान्दारिता नदेखाएको, पार्टीले सबै ठाउँमा उम्मेदवारी नदिएको, पटक–पटक सरकारमा गएको जनतालाई चित्त नबुझेको, सङ्गठन कमजोर भएको तथा पर्याप्त साधन र श्रोत नभएको लगायतका कारणले पार्टीले पराजय भोग्नुपरेको बताए ।
उनले हिजो प्रखर राष्ट्रवादी चिन्तन भएका केपी ओली प्रधानमन्त्री भएपछि नराम्रोसँग चुकेको भन्दै खुलेआम राष्ट्र विखण्डनको नारा लाग्दा, निर्मला पन्त हत्या प्रकरण र ३३ किलो सुन प्रकरणमा ठोस कदम चाल्न नसकेर निरिहता प्रदर्शन गरेको आरोप लगाए । आउदो फागुन ७ गतेदेखि राप्रपाले हिन्दु राष्ट्र पुर्नस्थापना लगायतका माग राखेर संघर्ष गर्ने भन्दै अध्यक्ष थापाले त्यसको लागि तयार रहन नेता तथा कार्यकर्तालाई आग्रह गरे ।