काठमाडौं,२४ मङसिर । संसदीय समितिले कञ्चनपुरकी १३ वर्षीया बालिका निर्मला पन्तको हत्यारालाई तत्काल सार्वजनिक गरी दोषीमाथि कडा कार्वाही गर्न नेपाल प्रहरीलाई पुनः निर्देशन दिएको छ ।

संघीय संसद राष्ट्रियसभा अन्तरगतको दिगो विकास तथा सुशासन समितिको सोमबार सिंहदरबारमा बसेको बैठकले मुलुकमा बढ्दो हत्या, हिंसा, चोरी, डकैदी नियन्त्रणका लागि आवश्यक सजकता र सतर्कता अपनाउन पनि नेपाल प्रहरीलाई सचेत गराएको छ ।

निर्मला पन्तको हत्यारालाई तत्काल सार्वजनिक गरी कडा कार्वाही गर्न नेपाल प्रहरीलाई पुनः निर्देशन दिनु परेको समितिकी सभापति तारादेवी भट्टले जानकारी दिनु भयो । समितिले मुलुकमा शान्ति सुरक्षा कायम गर्न पनि नेपाल प्रहरीलाई सतर्क रहन पनि सचेत गराएको छ ।

बैठकमा समितिका सदस्यहरुले निर्मला पन्तको हत्यारालाई अझै पक्राउ गर्न नसकेको भन्दै प्रहरी महानिरीक्षक सर्वेन्द्र खनालको चर्को आलोचना गरेका थिए ।

जवाफमा प्रहरी महानिरीक्षक खनालले निर्मला पन्तको हत्याराको खोजी कार्य जारी रहेको बताउनु भयो । उहाँले सो घटनालाई प्रभावित तुल्याउने गतिविधि हुन नदिन समितिसँग आग्रह पनि गर्नु भयो ।

महानिरीक्षक खनालले नेपाल प्रहरीले सो घटनाको अनुसन्धानको कामलाई आफ्नो क्षमताले भ्याएसम्म इमान्दारिताका साथ गरिरहेको पनि स्पष्ट पार्नु भयो । सिसीटिभीलगायतका लअनुसन्धानलाई सहज बनाउने संयन्त्र नभएकाले सो घटनाको अनुसन्धानलाई टुंगोमा पु¥याउन समय लागेको उहाँको भनाई थियो ।

प्रहरी महानिरीक्षक खनालले निर्मला पन्तको हत्यारालाई कार्वाहीको दायरामा ल्याउने प्रतिवद्धता पनि समिति समक्ष पटकपटक दोहो¥याउनु भयो ।