झापा,२६ भाद्र । झापामा कपडा व्यवसायी गर्दै आएका एक व्यक्तिको अपहरणपछि हत्या भएको छ ।

कमल गाउँपालिका ६ मंगलबारे निवासी ३८ बर्षीय खेमराज पौडेलको अपहरणपछि हत्या भएको प्रहरी कार्यालय झापाका प्रहरी नायव उपरीक्षक जितेन्द्रकुमार बस्नेतले जानकारी दिए । उनका अनुसार पौडेललाई हत्या गरी फालिएको शव गौरीगञ्ज ६ स्थित बाह्सुद्दीस्थित विनोद यादवको धान खेत नजिकै रहेको नालामा मंगलबार विहान भेटिएको हो । मृतक पौडेलको घाँटी र टाउकोमा छुरा प्रहार गरिएको उनले बताए ।

घटनास्थलमा उनको मे ७ प १९०४ नम्बरको मोटरसाइकल, मोवाइल फोन, व्याग फेला परेको छ ।अहिले घटनास्थलमा इलाका प्रहरी कार्यालय गौरीगञ्जका प्रहरी निरीक्षक टेकेन्द्र पौडेलले थप अनुसंन्धान गरिरहेको जनाइएको छ । यता प्रहरीले हत्या गरिएको आशंकामा गौरीगञ्ज निवासी सद्धाम हुसेनलाई पक्राउ गरेको छ ।

प्रहरीले दिएको जानकारी अनुसार सोमबार बेलुका मे ७ प १९०४ नम्बरको मोटरसाइकलमा सवार पौडेल र उनकी श्रीमती पसलको ताकेता उठाउन गौरीगञ्ज बजार आएका थिए ।

करिब ६ बजेको समयमा श्रीमतीलाई खाजा पसलमा छाडेर पौडेलकै मोटरसाइकलमा सद्धाम हुसेन बसाएर ताकेताका रकम उठाउन गएका थिए ।

श्रीमानले सद्धामसँग ९० हजार रुपैयाँ पाउनु थियो सोही रकम लिन उसँग गएको उनका श्रीमतीले प्रहरीलाई बयान दिएका प्रहरी उपरीक्षक बस्नेतले बताए ।

सद्धामसंग गएका पौडेल अवेर रातीसम्म नफर्किएपछि उनी अपहरण परेको भनि श्रीमतीले इलाका प्रहरी कार्यालय गौरीगञ्जमा जानकारी गराएका थिए । अपहरणमा परेको सूचना पाएलगतै प्रहरीले उनको रातभर खोजतलास गरेका थिए ।

‘तर, ‘उनको शव हत्या गरिएको अवस्थामा विहान मात्र फेला परियो, प्रहरी उपरीक्षक बस्नेतले भने । सद्धामसंग पौडेल गएको र विहान शव फेला परेकोले प्रहरीले उनलाई पक्राउ गरी अनुसंन्धान गरिरहेको उनले बताए ।