काठमाडौँ, ६ साउन । सत्तारुढ दल नेपाल कम्युनिष्ट पार्टी (ने क पा) युवा तथा विद्यार्थी संगठनले निजी क्षेत्रबाट सञ्चालित सम्पूर्ण मेडिकल कलेजहरुलाई अविलम्ब राष्ट्रियकरण वा गैरनाफामुखी ट्रष्टमा रुपान्तरण गर्न माग गरेका छन् ।

आइतबार वाइसिएल नेपाल, युथ फोर्स, अनेरास्ववियु र अनेरास्ववियु क्रान्तिकारीको नाममा जारी विज्ञप्तिमा सबै प्रदेशमा एक सुविधा सम्पन्न सरकारी शिक्षण अस्पताल सञ्चालनको प्रक्रिया तत्काल थाल्न समेत सरकारसँग माग गरिएको छ ।

संगठनले चिकित्सा शिक्षा भित्रको छात्रवृत्तिलाई न्यून आय, गरिव र लक्षित समुदाय आधारित बनाई त्यसलाई पारदर्शिता ढंगले वितरण गर्न समेत माग गरेका छन् ।

मुलुकमा चिकित्सा शिक्षाको क्षेत्रमा देखिएका समस्या उपर संगठनको गम्भीर ध्यानाकर्षण भएको जनाउँदै संसदमा पेश भएको चिकित्सा शिक्षा विधेयक, डा।गोविन्द केसिको आन्दोलन र त्यसले सृजना गरेको अन्यौलताको सन्दर्भमा नेपाल सरकार लगायतका सवै सम्वद्ध निकायहरुलाई गम्भीर हुन समेत आग्रह गरिएको छ ।

विज्ञप्तिमा डा. गोविन्द केसिको आन्दोलनमा भएको राजनीतिक घुसपैठ, अराजकता र दण्डहीनताको तत्काल अन्त्य गर्न माग समेत गरिएको छ ।