काठमाडौं, १२ फागुन । प्रधानमन्त्री सुशीला कार्कीले लोकतान्त्रिक मूल्य र मानव अधिकारको सम्मान तथा संरक्षणप्रति नेपाल सरकार अडिग रहेको बताएकी छन्। जेनेभामा आयोजित संयुक्त राष्ट्रसङ्घीय मानव अधिकार परिषद्को ६१औँ सत्रलाई भर्चुअल माध्यमबाट सम्बोधन गर्दै प्रधानमन्त्री कार्कीले सुदृढ नीतिगत,कानुनी तथा संस्थागत संयन्त्रमार्फत मानव अधिकारको प्रभावकारी कार्यान्वयनमा नेपाल निरन्तर क्रियाशील रहेको समेत बताएकी हुन्।

उनले नेपालको संविधानले मानव अधिकार तथा मौलिक स्वतन्त्रतालाई लोकतान्त्रिक शासन व्यवस्थाको आधारस्तम्भका रूपमा स्थापित गरेको धारणा समेत राखिन् । सबै प्रकारका मानव अधिकारको संरक्षण र प्रवद्र्धनमा सरकार प्रतिबद्ध रहेको उनको भनाइ छ ।त्यस्तै उनले भ्रष्टाचारविरुद्ध कडा कदम चाल्दै सुशासन कायम गर्ने आफू नेतृत्वको सरकारको मुख्य प्राथमिकता भएको र आसन्न प्रतिनिधिसभा निर्वाचन स्वतन्त्र,निष्पक्ष र विश्वसनीय रूपमा सम्पन्न गर्न सम्पूर्ण तयारी गरिएको समेत उल्लेख गरिन्।द प्रधानमन्त्री कार्कीले संयुक्त राष्ट्रसङ्घको बडापत्रमा उल्लिखित उद्देश्य र सिद्धान्तप्रति नेपाल पूर्ण रूपमा प्रतिबद्ध रहेको स्पष्ट पार्दै सङ्क्रमणकालीन न्याय प्रक्रियालाई पारदर्शी, समावेशी, विश्वसनीय र पीडित–केन्द्रित ढङ्गले अगाडि बढाइने समेत बताइन्।