काठमाडौं,५ साउन । आफूलाई जातीय छुवाछूत र कुटपिट गर्नेलाई अदालतले जेल सजाय तोकेपछि न्यायको अनुभूति गर्न नपाई विष खाएर आत्महत्याको प्रयास गर्नुभएकी बुद्धमाया विश्वकर्माको काठमाडौंस्थीत ग्रीनसिटि अस्पतालले निशुल्क उपचार गरेको छ ।
अस्पतालले शनिबार पत्रकार सम्मेलन गर्दे ४८ बर्षिया विश्वकर्माको स्वास्थ्य अवस्था अहिले सामान्य रहेको पनि जनाएको छ ।
असार २७ गते बुधबार दिउँसो बुद्धमायाले विष खाएर बेहोस भएपछि उपचारका लागि बर्दिबास चोकस्थित शुभस्वस्तिक अस्पतालमा राखिएको थियो । तर उहाँको उपचारमा सुधार नभए पछि शनिबार काठमाडौं ल्याएर ग्रिन सिटी अस्पतालमा उपचार गरेपछि स्वास्थ्यमा सुधार आएको हो ।
ग्रिन सिटी अस्पतालका डा.सन्तकुमार दासको नेतृत्वमा डाक्टर खेम भुषाल र डांक्टर रोशन ढकालको टोलीले बुद्धमाया विश्वकर्माको अवस्था जटिल बनेको भन्दै आइसियूमा राखेर थप उपचार गर्नुभएको थियो ।
अस्पतालका अध्यक्ष लोकवहादुर टण्डनले विष अत्यधिक मात्रा भएकोले स्वास्थ्य अवस्था जटिल बनेको र अहिले पूर्ण रुपमा स्वस्थ भईसकेको जानकारी दिनुभयो । उहाले असहाय बिरामीका लागी अस्पतालले निशुल्क स्वास्थ्य उपचार सेवा गरेको बताउनुभयो ।
पत्रकार सम्मेलनमा विश्वकर्मा समाज नेपाल प्रदेश २ का अध्यक्ष तथा दलित अधिकारकर्मी मीन रणपालले समाजमा दलित समूदाय असुरक्षित रहनेको प्रमाण यो घटना रहेको बताउनुभयो ।
धारामा पानी छोएको भन्दै बुद्धमाया विश्वकर्माकी छोरी मनिषा र उनलाई कुटपिट गर्ने स्थानीय कमला गिरीविरुद्ध जिल्ला अदालत महोत्तरीले यही असार २४ गते जातीय विभेदको कसुर गरेको ठहर गर्दै ६ महिना कैद, १० हजार रुपैयाँ जरिवाना र पीडितलाई ५० हजार रुपैयाँ क्षतिपूर्ति भराउने फैसला गरेको थियो ।
यसलाई दलित समुदायले ऐतिहासिक फैसला मानेका छन् । तर विश्वकर्माले उही टोलमा बस्नुपर्ने भएको कारण सामाजिक डर, त्रास र असुरक्षित महसुस गरी विष खाएर आत्महत्या गर्ने प्रयास गर्नुभएको बताईएको छ ।
प्रतिक्रिया दिनुहोस्