काठमाडौँ,३ असार । नेपाली कांग्रेसका सांसद मिनेन्द्र रिजालले प्रतिनिधिसभा नियमावलीको नियम ५६ को व्यवस्था अनुसार प्रधानमन्त्रीलाई प्रत्यक्ष कुराकानी गर्नका लागि संसदमा उपस्थित गराउन माग गर्नुभएको छ ।

आईतबार प्रतिनिधीसभामा बैठकको शुन्य समय सकिएलगत्तै नियमापत्ति गर्दै सांसद रिजालले प्रतिनिधि सभा नियमावली पास भएको केही दिनमा यसको उल्लंघन भएको दावी गर्नुभयो ।

रिजालले महिनाको पहिलो र तेस्रो हप्तामा एक घन्टा प्रत्यक्ष कुराकानी गर्न प्रधानमन्त्रीको समय निर्धारण गर्नुपर्ने व्यवस्था अविलम्व सुरुवात गर्न माग गर्नुभयो । उहाले काग्रेसले जनताको आवाज सदनबाटै उठाउने धारणा पनि राख्नुभयो ।

सांसद रिजालले उठाएको बिषयमा सभामुख कृष्णबहादुर महराले रिजालले उठाएको प्रश्नप्रति गम्भीर ध्यानार्कण भएको बताउदै कार्य व्यवस्थाको बैठकपछि यसलाई अघि बढाइने आश्वासन दिनुभयो ।