जनकपुर, २७ वैशाख । प्रदेश २ का मुख्यमन्त्री लालबाबु राउतले प्रधानमन्त्री केपी शर्मा ओली भारतीय प्रधानमन्त्री नरेन्द्र मोदीे नेपाल आउनुभन्दा एक घन्टाअघि नै जनकपुर पुग्ने जानकारी दिएका छन् ।

उनले भारतीय प्रधानमन्त्रीको भ्रमणबारे सबै काममा सावधानी अपनाएर काम गरिरहेको बताएका छन् ।

आफ्नै कार्यकक्षमा पत्रकारसँग कुरा गर्दै उनले भारतीय प्रधानमन्त्रीको स्वागतमा जनकपुरमा लाखौंको संख्यामा मानिसहरुको उपस्थिति हुने पनि बताएका छन्। उनले भने, ‘लाखौंको संख्यामा जनताहरु उपस्थित हुनेछन्।’ भ्रमणलाई ऐतिहासिक बनाउनकै लागि प्रदेशभर सार्वजनिक बिदा दिइएको उनले बताए। ‘प्रदेश २ का ८ वटै जिल्लामा बैठक गरेरै बिदाको निर्णय गरिएको हो,’ उनले भने।

अहिले विशेषगरी सरसफाइमा केन्द्रित भएको भन्दै उनले सुरक्षाकर्मी मात्रै एक हजारको संख्यामा खटिएको जानकारी दिए। ‘प्याब्सन, एनप्याब्सन, हिसान लगायतका संगठनलाई आग्रह गरेरै सरसफाइ र आफ्नो क्षेत्रमा सुरक्षा संवेदनशीलता अपनाउन आग्रह गरेका छौं,’ मन्त्री राउतले भने।

प्रदेश २ बाट हुने मोदीको भ्रमणले मुलुकको विकास, समृद्धि र पहिचानका लागि सहयोग पुर्‍याउने उनले विश्वास व्यक्त गरेका छन्। ‘उहाँको आगमनलाई खुसी, हर्ष र गौरवको रुपमा लिएका छौं,’ राउतले भने, ‘समग्र मुलुककै लागि यो गर्वको विषय हो।’

बुधबार बिहानको हावाहुरीले प्रवेशद्वारहरु भत्किएको जानकारी दिँदै उनले त्यसको निर्माण अहिले तीव्र गतिमा भइरहेको बताए। ‘नागरिक अभिनन्दनको तयारी पनि पूरा भएको छ। स्टेज निर्माणको काम बेलुकासम्म सकिन्छ। त्यसपछि हामी सुरक्षा निकायलाई हस्तान्तरण गर्नेछौं,’ उनले भने।

दुईदिने नेपाल भ्रमणमा आउन लागेका प्रधानमन्त्री मोदीले भ्रमणको पहिलो दिन शुक्रबार २ घन्टा जनकपुरमा बिताउनेछन्। उनी बिहान १०:१५ बजे जनकपुर अवतरण हुनेछन्।