गुल्मी,१९ बैशाख । गुल्मीमा खोटो संकलन गर्ने श्रमिकहरुलाई खोटो संकलन गर्दा ध्यान दिनु पर्ने बिभिन्न बिषयमा सचेतना कक्षा प्रदान गरिएको छ । १२९ औ अन्तराष्ट्रिय श्रमिक दिवसको अवसर पारेर दुर्गा स्वस्तिक रोजिना टार्पेन्टाइन इण्डष्ट्रि प्रालि गुल्मीले तालिम प्रदान गरेको हो । खोटो संकलन गर्ने श्रमिक, सुपरभाइजर तथा सामुदायिक बनका पदाधिकारीहरुलाई खोटो संकलन केन्द्र रेसुङ्गाको गौशालामै लगेर तालिम दिइएको हो ।

तालिममा सल्लाको रुख भएको बन क्षेत्रमा खोटो संकलन गर्ने तरिका, त्यसको संरक्षण लगायतका बिषयमा सहजिकरण गरिएको प्रमुख उप्रेतीले बताए । त्यस्तै खोटो संकलन गर्दा रुखको अबस्था देखि प्रयोग गर्ने औजार, वरिपरिको अबस्था र संकलन पछीको अबस्था, सरसफाई लगायतका बारेमा पनि जानकारी दिइएको थियो । खोटो संकलनसँगै बनको अबस्थालाई पनि बिग्रन नदिन एकदमै सजक बन्न संस्था र श्रमिकहरुलाई जिल्ला वन अधिकृत कृष्ण न्यौपानेले आग्रह गरे ।

खोटो संकलनको क्रमम साना प्राबिधिक पक्षलाई दिए मात्रै बनमा हुने अनावश्यक क्षतीलाई न्यूनिकरण गर्न सकिने सहायक बन अधिकृत दिनेश सत्यालले बताए । यो सचेतना मुलक कार्यक्रमले रुखहरुको संरक्षणमा फाइदा मिलोश भन्ने उदेश्यले आफुहरुको रहेको संस्थाले जनाएको छ ।

तालिममा जिल्ला बन कार्यालय गुल्मीका अधिकृत कृष्णराज न्यौपाने, सहायक बन अधिकृतहरु पन्नालाल भट्टराई, दिनेश सत्याल लगायतले खोटो संकलन पूर्व ध्यान दिनुपर्ने बिषयमा सहजिकरण गरेका थिए । खोटो संकलनको लागि फागुन देखि असोजसम्मको महिनालाई उपयुक्त मानिन्छ । एउटा सल्लाको रुखबाट तीन किलो देखि सात किलो सम्म खोटो संकलन हुने गर्दछ ।

हाल गुल्मी जिल्लामा सल्लाको बन भएका ३४ वटा सामुदायिक बनमा खोटो संकलन हुँदै आएको छ । जिल्लामा आर्थिक वर्ष ०७४÷०७५ मा ११ वटा समाुदायिक बनबाट एक लाख १७ हजार ३९ किलो खोटो संकलन भएको जिल्ला बन कार्यालय गुल्मीको तथ्याङ्कमा उल्लेख छ ।

कार्यक्रमको लागि जिल्ला बन कार्यालय गुल्मी, इलाका बन कार्यालय गुल्मी र सेक्टर बन कार्यालय गुल्मीले प्राबिधिक सहयोग गरेका थिए ।