काठमाडौं, २६ चैत्र । परराष्ट्रमन्त्री शिशिर खनाल मोरिसस जाने क्रममा बिहीबार नयाँ दिल्लीस्थित इन्दिरा गान्धी अन्तर्ष्ट्रिय विमानस्थल ट्रान्जिटमा थिए। नवौँ हिन्द महासागर सम्मेलनमा भाग लिन त्यसतर्फ प्रस्थान गरेका मन्त्री खनाललाई इन्दिरा विमानस्थल पुगेर नयाँ दिल्लीस्थित नेपाली दूतावासका नियोग उपप्रमुख डा। सुरेन्द्र थापासहितका दूतावास कर्मचारीले स्वागत गरेका छन्।

काठमाडौंबाट सिधा उडान नभएका कारण दिल्ली हुँदै मोरिसस जान लागेका मन्त्री खनाललाई स्वागत गर्न डा. थापा विमानस्थलको ट्रान्जिट लाउन्ज पुगेका हुन्। बालेन शाह नेतृत्वको नयाँ सरकारले भारतका लागि नेपाली राजदूत डा. शंकर शर्मासहित अरू राजदूतहरूलाइ पनि फिर्ता बोलाउने चर्चा भइरहेको छ।

परराष्ट्र मन्त्रालयको नेतृत्व सम्हालेलगत्तै मन्त्री खनालको यो पहिलो विदेश भ्रमण हो। अप्रिल १० देखि १२ सम्म मोरिससमा हुने सम्मेलनमा उनले नेपालको प्रतिनिधित्व गर्नेछन्। सम्मेलनमा सहभागी हुन जानुअघि दिल्लीमा भएको यो संक्षिप्त ट्रान्जिट र नियोग उपप्रमुखसँगको भेटलाई कूटनीतिक वृत्तमा सामान्य प्रक्रिया मानिए पनि राजदूत फिर्ता बोलाउने चर्चा भइरहेको अवस्थामा यसले विशेष अर्थ राखेको छ।