काठमाडौं, १८ चैत्र । मकवानपुरको हेटौँडा उपमहानगरपालिका–९ गुम्बाचोकस्थित पूर्व–पश्चिम सडक खण्डमा बुधबार ९चैत १८० भएको सवारी दुर्घटनामा एकजनाको मृत्यु भएको छ भने दुईजना घाइते भएका छन् ।

बिहान करिब ११ः२५ बजे हेटौँडाबाट रातोमाटेतर्फ जाँदै गरेको प्रदेश ३–०२–००७ प ७६८३ नम्बरको मोटरसाइकल र विपरीत दिशाबाट आउँदै गरेको ना ४४ प ९३५४ नम्बरको मोटरसाइकल एकआपसमा ठोक्किँदा दुर्घटना भएको हो । दुर्घटनामा प्रदेश ३–०२–००७ प ७६८३ नम्बर मोटरसाइकल चालक हेटौँडा–४ कर्रा निवासी १९ वर्षीय रोनिक कार्की सामान्य घाइते भएका छन् । सोही मोटरसाइकल पछाडि सवार हेटौँडा–९ निवासी १८ वर्षीया एकता वैद्य गम्भीर घाइते भएकी थिइन् ।

ठक्करपछि उनी नवलपरासीबाट सिमेन्ट बोकी वीरगन्जतर्फ जाँदै गरेको ना ६ ख ३१४५ नम्बरको ट्रकमा समेत ठोक्किएकी थिइन् ।गम्भीर घाइते वैद्यलाई उपचारका लागि हेटौंडा अस्पताल लगिएकामा दिउँसो १२ः२० बजे चिकित्सकले मृत घोषणा गरेका हुन् ।

त्यसैगरी, अर्को मोटरसाइकल चालक चितवन इच्छाकामना गाउँपालिका–५ बदेलटार निवासी २१ वर्षीय पुष्पलाल गुरुङ घाइते भएका छन् । घाइते दुवैको हेटौँडा अस्पतालमा उपचार भइरहेको छ ।दुर्घटनामा संलग्न दुवै मोटरसाइकल, ट्रक तथा ट्रक चालक बाँके कोहलपुर नगरपालिका–१४ निवासी ३३ वर्षीय बद्री गडरियालाई जिल्ला प्रहरी कार्यालय मकवानपुरले नियन्त्रणमा लिएको छ ।घटनाबारे थप अनुसन्धान भइरहेको प्रहरीले जनाएको छ ।