काठमाडौँ, १३ साउन । भारतले जम्मू कश्मीरको पहलगाममा भएको आतंककारी आक्रमणमा संलग्न तीन जनालाई मारेको दाबी गरेको छ।भारतीय गृहमन्त्री अमित शाहले मंगलबार संसदलाई अपरेसन सिन्दुरबारे जानकारी दिने क्रममा त्यसको खुलासा गरेको द हिन्दुले लेखेको छ।शाहका अनुसार अपरेसन महादेव नाम दिइएको कारबाहीमा सोमबार भारतीय सुरक्षाकर्मीले ती तीन जनालाई कश्मीरको दचीगाममा मारेको हो।

पहलगाम आक्रमणको मुख्य योजनाकार सुलेमान सहित जिब्रान र अफगान भाइलाई मारेको उनले बताएका छन्।उनीहरूबाट पाकिस्तानी मतदाता परिचय पत्र र पाकिस्तानमा बनेको चकलेट बरामद भएकाले उनीहरू पाकिस्तानी नागरिक भएको पुष्टि भएको उनले दाबी गरेका छन्।पाकिस्तानले भने पहलगाम आक्रमणमा पाकिस्तानी नागरिकको संलग्नता नरहेको दाबी गर्दै आएको छ।मारिएका तीन जनाबाट बरामद हतियार र पहलगाम आक्रमणमा प्रयोग भएका गोलीको विश्लेषण गर्दा मेल खाएकाले उनीहरू सो आक्रमणमा संलग्न भएको प्रमाणित भएको खुलासा गरे।पहलगामको पर्यटकीय क्षेत्रमा अप्रिल २२ मा आतंककारी हमला हुँदा नेपालको बुटवलका सुदीप न्यौपानेसहित २६ जनाको मृत्यु भएको थियो। त्यसको दुई हप्ता पछि मे ७ मा पाकिस्तानभित्र आक्रमण गरेर भारतले जबाफ दिएको थियो।

भारतले अपरेसन सिन्दुर नाम दिएको सो कारवाही पछि भारत र पाकिस्तानबीच चार दिन युद्ध भएको थियो।त्यस क्रममा भारतका पाँच वटा लडाकू विमान खसालेको दाबी पाकिस्तानले गरेको थियो। ती पाँचमध्ये तीन वटा फ्रान्समा निर्मित रफाल, एउटा रूसमा निर्मित मिग-२९ र अर्को रूसमै बनेको सुखोइ सु-३० भएको पाकिस्तानले दाबी गरेको थियो।

भारतले आधिकारिक रूपमा आफ्ना लडाकू विमान खसालेको बारेमा बोलेको छैन। तर भारतीय सेनाका विभिन्न अधिकारीहरूले आफ्ना विमान खसालिएको भनेर अलग-अलग समयमा स्वीकार गरेका छन्। यद्यपि, कति वटा र कुन विमान खसालिएको भनेर चाहिँ खुलासा गरेका छैनन्।