बुटवल, ५ चैत्र ।
नेपाली कांग्रेस प्रदेश नम्बर ५ को संसदीयदलको नेतामा बलदेव शर्मा निर्वाचित भएकाछन् । आज सम्पन्न कांग्रेस संसदीयदलको नेताको निर्वाचनमा संसदकै जेष्ठ सदस्य शर्मा संसदीय दलको नेतामा निर्बिरोध चयन भएका हुन्।
संसदीय दलका लागि ५ जनाको उम्मेद्वारी दर्ता भएकोमा आज रुपन्देहीका फकरुद्धिन खा, कपिलवस्तुका बीरेन्द्र कुमार कनौडिया, पाल्पाका बीरबहादुर राना र दाङका डिल्ली चौधरीले उम्मेद्वारी फिर्ता लिए पछि शर्मा निर्बिरोध संसदियदलको नेता निर्वाचित भएकाहुन् ।
गत फागुन ६ गते संसदीय दलको नेता चयनका लागि उमेद्वारी दर्ता गर्दा ५ जनाको उम्मेद्वारी परेपछि सहमतिका लागि पटकपटक मतदानको कार्यक्रम स्थगित गरीएको थियो।

कांग्रेस केन्द्रले दलको प्रदेश संसदीय दलको नेता चयन गर्न केन्द्रिय सदस्य खाँणलाई जिम्मा दिएको थियो भने निर्वाचन प्रक्रिया अघि बढाउन बरिष्ठ अधिबक्ता बुद्धबहादुर थापाको संयोजकत्वमा निर्वाचन समिति गठन गरेको थियो।
संसदीय दलको नेतामा सर्वसम्मत भएका ७९ बर्षिय शर्मा प्रदेशसंसदका जेष्ठ सदस्य हुन् । शर्माले सभामुख चयन नहुँदासम्म प्रदेश सभामा सभामुखको भुमिका निर्वाह गरेका थिए।