काठमाडौं ३० माघ । युरोपेली च्याम्पियन्स लिग फुटबलको नकआउट प्लेअफ चरणको पहिलो लेगमा रियल मड्रिडले म्यानचेस्टर सिटीलाई हराएको छ ।

सिटीकै घरेलु मैदान इत्तिहादमा भएको खेलमा रियलले उत्कृष्ट पुनरागमन गर्दै सिटीलाई ३–२ गोलले हरायो । सिटीका लागि इर्लिङ हालान्डले दुई गोल गरे पनि टिमलाई जिताउन सकेनन् ।

रियल मड्रिडका केलियन एम्बाप्पे, ब्राहिम डियाज र बेलिङहमले गोल गरे । ८० औं मिनेटसम्म सिटी २–१ गोलले अघि थियो । तर ८६ मिनेटमा डियाज र इन्जुरी समयको दोस्रो मिनेटमा बेलिङहमले गोल गरेर रियललाई जिताए ।

अब दोस्रो लेग रियलको घरेलु मैदानमा हुनेछ । च्याम्पियन्स लिगमा शीर्ष आठ वटा टोलीले प्लेअफ चरण छोडेर सीधै मार्चमा हुने राउन्ड अफ १६ मा स्थान पक्का गरिसकेका छन् ।

उपाधिको ‘हकदार’ ठानिएका सिटी र रियलले शीर्ष आठमा पुग्न नसकेपछि प्लेअफ खेलेका हुन् ।

लिगमा गएराति नै भएका अरु खेलमा पीएसजीले ब्रेस्टलाई, बोरुसिया डर्टमन्डले स्पोर्टिङलाई र युभेन्टसले पीएसभीलाई हराएका छन् ।