काठमाडौं, २ चैत । प्रतिनिधिसभाको शुक्रबार बैठकले फागुन २८ गते भएको युएस बंगला विमान दुर्घटना बारे विशेष शोक प्रस्ताव पारित गरेको छ।

बैठकले दुर्घटनाप्रति गहिरो दुख प्रकट गर्नुका साथै दिवंगत आत्माको चीर शान्तिको कामना गर्दै घाइतेको शीघ्र स्वास्थ्य लाभको कामना गरेको छ । संसद बैठकमा दुर्घटनामा ज्यान गुमाउनेहरुको सम्मानमा एक मिनेट मौनधारण पनि गरिएको छ ।

प्रधानमन्त्री केपी शर्मा ओलीले सभालाई सम्बोभन गर्दै ४९ जनाको मृत्यु हुने गरी भएको विमान दुर्घटनालाई सरकारले गम्भीर रुपमा लिएको बताएका छन्।

उनले विमान दुर्घटनाले देश नै शोक डुबेको बताए। उनले संसदमा सम्बोधन गर्ने क्रममा विमान दुर्घटनाले आफ्नो मन भारी भएको बताउँदै भने, ‘अप्रिय, हृदय विदारक घटनाले मन भारी लिएर उभिएको छु।’

प्रधानमन्त्री ओलीले आयोगको प्रतिवेदनका आधारमा आवश्यक कदम चाल्ने समेत बताए।

फागुन २८ गते भएको विमान दुर्घटनामा ज्यान गुमाएका ४९ जनामध्ये २२ जना नेपाली, २६ जना बंगलादेशी र १ जना चिनियाँ नागरिक रहेका छन् ।घाइतेमध्ये १७ जना काठमाडौंको विभिन्न अस्पतालमा उपचार गराइरहेका छन् भने ३ जना डिस्चार्ज भएर घर फर्किएका छन् ।