काठमाडौँ । प्रधानमन्त्री एवम् नेकपा एमालेका अध्यक्ष केपी शर्मा ओलीले नेकपा माओवादी केन्द्र सँगको पार्टी एकतामा कुनै धोका नहुने स्पष्ट गरेका छन् ।

झापा आन्दोलनका पाँच शहीदको ४५औँ वार्षिक स्मृति दिवसका अवसरमा एमाले केन्द्रीय कार्यालय धुम्बाराहीमा भएको स्मृति सभा कार्यक्रममा उहाँले आफ्नो पार्टी विगतदेखि नै कम्युनिस्ट आन्दोलनलाई एकताबद्ध र मुलुकको समृद्धिका लागि क्रियाशील रहेकाले पार्टी एकतालाई सावधानीपूर्वक अघि बढाउन दृढ संकल्पित रहेको बताए ।

उनले शहीदको योगदानबाट मुलुक संघीय लोकतान्त्रिक गणतन्त्रको अवस्थामा आइपुगेकाले उनीहरुको आकांक्षाअनुसार मुलुकको सामाजिक न्याय र समानता तर्फको यात्रालाई सरकारले लोकतान्त्रिक विधिअनुसार पूरा गर्ने प्रतिबद्धता व्यक्त गरे । तत्कालीन पञ्चायत सरकारले २०२९ फागुन २१ गते झापा आन्दोलनका नेताहरु रामनाथ ढकाल, नेत्र घिमिरे, वीरेनसिंह राजवंशी, कृष्ण कुइँकेल र नारायण श्रेष्ठलाई झापा र इलामको सिमानामा पर्ने सुखानी जंगलमा लगी हत्या गरेको थियो ।

स्मृति सभामा एमालेका वरिष्ठ नेताहरु झलनाथ खनाल, माधवकुमार नेपाल, उपाध्यक्ष वामदेव गौतम, झापा आन्दोलनका नेता राधाकृष्ण मैनाली, शहीद परिवारका सदस्यलगायत थिए ।
धेरै लामो समयसम्म पार्टी एकताका उतारचढावका विषयमा मौन जस्तै रहेको अध्यक्ष ओली माओवादी नेताहरुको अनुपस्थिति र प्रायजसो एमाले शिर्ष नेताहरु सहभागी कार्यक्रममा एकतामा धोका नहुने बताएर एमालेभित्र चलिरहेको द्धन्दलाई आश्वस्त पार्न खोजेका हुनसक्छन् । त्यसो त पार्टी एकता प्रक्रियाका सन्दर्भमा सहकर्मी प्रचण्डका अभिव्यक्तिबाट बेलामौकमा बेचैन जस्ता बन्ने गरेका अ‍ोलीले धोका शव्दको प्रयोग गरेर कुटनीतिक प्रहार पनि गरेका हुन सक्छन् । स्रोतहरुका अनुसार अझै पनि माओवादी केन्द्रभित्रका केही नेताहरु पार्टी एकताबाट पछि हट्नुपर्ने रणनीतिमा रहेका छन् । त्यसैलाई ओलीले धोका शव्द प्रयोग गरेर षडयन्त्र निस्फल पार्न खोजेका पनि हुनसक्छन् । ओलीका शव्द सोचविचार गरेरमात्रै व्यक्त हुने गरेका छन् । निशाना र हेराईमा तालमेल पुर्याएर बोल्ने ओलीले एकतालाई चांडो निश्कर्षमा पुर्याउन त्यस्तो अभिव्यक्ति दिएको उनी निकटवर्तीहरुले बताएका छन् ।