काठमाडौं, २५ माघ । आदिवासी जनजाति आन्दोलनको जगबाट स्थापित आदिवासी जनजाति उत्थान राष्ट्रिय प्रतिष्ठानलाई सरकारले गर्दै आएको व्यवहारप्रति आदिवासी जनजाति नेताहरुले आक्रोस व्यक्त गरेको छ ।

आदिवासी जनजाति उत्थान राष्ट्रिय प्रतिष्ठानको १७औं स्थापना दिवसको अवसरमा आयोजित कार्यक्रममा आदिवासी जनजाति अगुवाहरुले प्रतिष्ठानको कार्यक्षेत्र र बजेट कटौती गर्दै प्रतिष्ठानलाई बेवारिसे बनाउन खोजेको बताए ।

नेपाल आदिवासी जनजाति महासंघका पूर्वमहासचिव तथा माओवादी केन्द्रका नेता सुरेश आलेमगरले प्रतिष्ठानलाई कमजोर पार्दै आदिवासी जनजातिका अधिकार कुण्ठित गर्ने कामे लोकतन्त्र नै कमजोर हुने बताए । सरकारले विघटन गर्न खोजे आदिवासी जनजातिहरु आन्दोलित हुनुको विकल्प नहुने बताए ।

आदिवासी जनजाति उत्थान राष्ट्रिय प्रतिष्ठानका उपाध्यक्ष चन्द्रबहादुर गुरुङले त बजेट कटौती गरेर सरकारले प्रतिष्ठानलाई के गर्न खोजेको ? भनेर आक्रोस पोखे । अहिलेको बजेटको स्थितिले प्रतिष्ठानको परिषद बैठकसमेत राख्न नसकिने स्थिति रहेको उनको भनाइ थियो ।

हुन पनि अहिले बजेट पूरै कटौतीमा परेको छ । विकास बजेट जम्माजम्मी साढे दुई करोड छ भने प्रशासनिक तीन करोड छ ।

बजेट कटौती र आदिवासी जनजातिहरुको आक्रोस सुनेपछि कार्यक्रमको प्रमुख अतिथिका रुपमा सहभागी संघीय मामिला तथा स्थनीय विकास राज्यमन्त्री जनकराज चौधरीले प्रतिष्ठानको संस्थागत विकास गर्नका लागि सरकार प्रतिवद्ध रहेको बताए । बजेटको व्यवस्था गर्ने समेत उनले बताए ।

कार्यक्रममा कांग्रेसका प्रदेश सांसद नरोत्तम बैद्य, राप्रपा सभासद रीता माझी, नेपाल आदिवासी जनजाति महासंघका कावा अध्यक्ष नविन रोक्का, प्रतिष्ठानका पूर्व सदस्यसचिव लोकबहादुर थापामगर लगायतले शुभकामना मन्तव्य राखेका थिए ।