काठमाडौं, २५ माघ । हत्यामा संलग्न रही फरार रहेका मुखिया गुरुङलाई शुक्रबार भारतबाट सुपुर्दगी गरेर ल्याईदैछ । यो सुपुर्दगी भारतले नेपालसंग गरेको पहिलो वैद्य सुपुर्दगी हो।

भारतले एक ‘मोस्ट वान्टेड’अपराधीलाई पक्राउ गरी आधिकारिक रुपमा नेपाललाई बुझाउँदैछ। जससम्बन्धी पत्रमा भारतीय विदेशमन्त्री सुष्मा स्वराजले हस्ताक्षर गरेकी छन्।

२१ वर्षअघि ठमेलमा इटालियन नागरिकको हत्या गर्ने मुखिया गुरुङलाई भारतले नेपाललाई सुपुर्दगी गर्न लागेको हो। नेपाल प्रहरीको टिमले भारतीय प्रहरीसँग औपचारिक रुपमा बुझेर गुरुङलाई नेपाल ल्याउँदैछ।

मुखियासहितका व्यक्तिहरुले २०५२ असोज २१ इटालियन नागरिक डेभिड क्यारारोको हत्या गरेका थिए। क्यारारोको प्रेमिकासँग विवाद हुँदा उनीहरुले रेगी पबभित्र कुटेरै उनको हत्या गरेका थिए।

घटनापछि फरार रहेका गुरुङलाई अदालतले जन्मकैद फैसला गरिसकेको छ। स्रोतका अनुसार गुरुङ मकाउमा बस्दै गएका थिए।

डेढ महिनाअघि भारत हुँदै मकाउ जाने क्रममा उनी जयपुर एयरपोर्टमा पक्राउ परेका हुन्। नेपाल प्रहरीले गुरुङको पासपोर्ट नम्बर पत्ता लगाई इन्टरपोलको ‘ब्ल्याक लिस्ट’मा राखेको थियो। सोही आधारमा उनी विमानस्थलमा पक्राउ परेका हुन्।

पक्राउ परेपछि उनलाई सुपुर्दगीका लागि नेपाल प्रहरीले पहल गरेको थियो। अदालतको आदेशपछि सुपुर्दगीको बाटो खुलेको हो। दिल्ली उच्च अदालतले गुरुङलाई नेपालमा सुपुर्दगी गर्न आदेश दिएपछि प्रक्रिया सुरु भएको हो।

‘दुई देशबीच अपराध अनुसन्धानमा यो ऐतिहासिक घटना हो,’ नेपाल प्रहरीका एक उच्च अधिकारी भन्छन्,‘खुला सीमा भएका दुई देशबीच यस्तो किसिमको सुपुर्दगी पहिले नै आवश्यक थियो।

सो घटनामा संलग्न टासी गुरुङलाई प्रहरीले दुई वर्षअघि पक्राउ गरेको थियो।

पक्राउ पर्ने डरले गुरुङले भारतको विमानस्थल प्रयोग गरेका थिए। तर, इन्टरपोलसँगको सहकार्यमा नेपाल प्रहरी उनलाई पक्राउ गर्न सफल भएको हो।

खुला सिमानाका कारण नेपाल र भारतका अपराधीहरु एकअर्काको देशमा गई लुक्न सहज बनेको छ । त्यस्ता अपराधीहरुलाई पक्राउ गरेर प्रहरीले गोप्य रुपमा एक(अर्कालाई बुझाउँदै आएको छ।

दुई देशबीच सुपुर्दगी सन्धि गर्न पटकपटक पहल गरे पनि सफल हुन सकेको छैन। भारतले ऐनमा अनावश्यक सर्त राख्ने भएकाले सन्धि हुन नसकेको हो।