काठमाडौं, २३ माघ । सरकारले अनावश्यकरुपमा सशस्त्र प्रहरीको एआईजी बढुवा गरेको भन्दै एक बहालवाला इन्सपेक्टर अदालत गएका छन्। सुर्खेतस्थित बाहिनीमा कार्यरत इन्सपेक्टर मेख बहादुर ओलीले बढुवा रद्द गर्न माग गर्दै सर्वोच्चमा रिट दायर गरेका हुन्।

संगठनमा अनाबश्यक रुपमा एआईजी दरबन्दी थपिएको र कामचलाउ सरकारले बढुवा गरेको भन्दै उनले बढुवा खारेज गर्न माग गरेका हुन्।

यसरी एआईजी बढुवाविरुद्ध संगठनकै अधिकारीले अदालतमा रिट हालेको यो पहिलो घटना भएको सशस्त्र प्रहरीका अधिकारीहरुले बताए।

गत साता सरकारले सशस्त्र प्रहरीमा ५ एआईजीको दरबन्दी थप गरी बढुवा गरेको थियो। बढुवा हुनेमा जानकीराज भट्टराई, सुबोधकुमार अधिकारी, निराकारम विक्रम शाह, खडानन्द चौधरी र राजेश श्रेष्ठ एआइजीमा बढुवा भएका थिए ।

यो संगै दरबन्दी थपविरुद्ध सर्वोच्चमा दुई साताअघि अर्को रिट दायर भएको थियो। दुवै रिटको फैसला भएको छैन।