सप्तरी, १९ माघ । महेन्द्र विन्देश्वरी बहुमुखी क्याम्पस राजविराजलाई नव स्थापित राजर्षि जनक विश्वविद्यालयमा गाभ्ने सरकारी निर्णय नसच्याईए कडा आन्दोलन गर्ने चेतावनी दिइएको छ ।

सोही क्याम्पसका प्राध्यापक तथा कर्मचारीहरूले उक्त निर्णयको बिरोध गर्दै शुक्रबार बिरोध -याली पश्चात् जिल्ला प्रशासन कार्यालय सप्तरी मार्फत प्रधानमन्त्री, शिक्षा मन्त्री, त्रिवि, विश्व विद्यालय अनुदान कार्यालय र त्रिविको रजिष्टार कार्यालय लगायतलाई ज्ञापन पत्र बुझाउँदै उनीहरुले सो चेतावनी दिएका हुन् ।

बुझाइएको ज्ञापनमा मविव क्याम्पस राजविराजलाई त्रिविकै आंगिक क्याम्पसको रुपमा रहने व्यवस्था मिलाउन अनुरोध गर्दै यदी माग अनुसार क्याम्पसलाई त्रिविको आंगिक क्याम्पसको रुपमा नराखिए बिरोधका कार्यक्रमहरु गर्न बाध्य हुने चेतावनी दिइएको छ ।

यता संघर्ष समितिका अध्यक्ष सिंघेश्वर प्रसाद यादवले मविव क्याम्पसलाई राजर्षि जनक विश्वविद्यालयमा गाभिए प्राध्यापक, कर्मचारीहरुको तलबदेखी पेन्सनसमेत प्रभवित हुने र विद्यार्थीहरुको सर्टिफिकेट समेतमा प्रभावित हुने बताउनुभयो ।

उहाँले नव स्थापित विश्वविद्यालयमा कुनै सेवा सुविधाको व्यवस्था समेत नरहेको आरोप लगाउनुभयो । नेपाल प्राध्यापक संघ मविव क्याम्पस इकाई समितिका सभापति सिंघेश्वर प्रसाद यादवको संयोजकत्वमा गठित संघर्ष समितिले निकालेको बिरोध -यालीमा क्याम्पसका प्राध्यापक, शिक्षक तथा कर्मचारीहरुको सहभागिता रहेको थियो ।

नव स्थापित राजर्षि जनक विश्वविद्यालयमा जनकपुरको राराव क्याम्पस, सिरहाको सत्यनारायण सूर्यनारायण मरबैता बहुमुखी क्याम्पस र राजविराजको मविव क्याम्पसलाई गाभिएको छ ।  नेपाल प्राध्यापक संघ, प्रजातान्त्रिक प्राध्यापक संघ, प्रगतिशिल प्राध्यापक संगठन, नेपाल राष्ट्रिय प्राध्यापक संगठन, मधेशवादी प्राध्यापक संघ, आंशिक शिक्षक संघ र त्रिवि कर्मचारी संघले उक्त निर्णयको बिरोधमा ऐक्यबद्धता जनाएका छन् । हाल यस क्याम्पसमा स्थायी, निजि, करार र आंशिक गरि १ सय २१ प्राध्यापक र ४१ कर्मचारी कार्यरत छन् ।