राजविराज, १८ माघ ।   महेन्द्र विन्देश्वरी बहुमुखी क्याम्पस राजविराजलाई नवस्थापित राजर्षि जनक विश्वविद्यालयमा गाभ्ने सरकारी निर्णायको यहाँ विरोध गरिएको छ ।

नेपाल प्राध्यापक संघ मविब क्याम्पस एकाइ राजविराजको नेतृत्वमा क्याम्पसका प्राध्यापक, शिक्षक तथा कर्मचारीको बृहत् बैठकमा वक्ताले उक्त निर्णय नसच्याइए प्राध्यापक तथा कर्मचारीले आन्दोलन थाल्ने चेतावनी दिएका छन् ।
नवस्थापित राजर्षि जनक विश्वविद्यालयमा जनकपुरको राराव क्याम्पस, सिरहाको सत्यनारायण सूर्यनारायण मरबैता बहुमुखी क्याम्पस र राजविराजको मविब क्याम्पसलाई गाभिएको छ ।

उक्त निर्णयको बिरोधमा राजविराजको मविब क्याम्पसका प्राध्यापक तथा कर्मचारीले विरोध जनाएको क्याम्पसले जनाएको छ ।
मविब क्याम्पस प्रमुख सर्वेशचन्द्र मिश्रले क्याम्पसलाई राजर्षि जनक विश्वविद्यालयमा गाभिए त्रिविअन्तर्गतको आंगिक क्याम्पसका प्राध्यापक, विद्यार्थीमा भयको वातावरण सिर्जना हुने बताउनुभएको छ ।

प्राध्यापक, कर्मचारीको तलबदेखि पेन्सनसमेत प्रभावित हुने र विद्यार्थीको सर्टिफिकेटसमेतमा प्रभावित हुने उहाँले बताउनुभयो ।
बैठकमा सहायक क्याम्पस प्रमुख मिथिलेश यादवले राजर्षि जनक विश्वविद्यालय प्रदेश नं २ मा स्थापना भएकोप्रति स्वागतयोग्य भएको भन्दै सो विश्वविद्यालयमा नयाँ क्याम्पसलाई आबद्धता गराउनु पर्नेमा जोड दिनुभयो । उहाँले मविब क्याम्पस राजविराज स्थापनाकालदेखि नै त्रिविमा रहेकाले यसलाई त्रिविमै यथावत् राख्न मागसमेत गर्नुभयो ।

यस्तै नेपाल आंशिक प्राध्यापक संघका सभापति रन्धिर कुमार कर्णले राजर्षि जनक विश्वविद्यालयमा मविब क्याम्पस राजविराज गाभिएमा क्याम्पसका अस्थायी, करार, आंशिक शिक्षक र कर्मचारी स्वतः खारेज हुने उल्लेख भएकाले यस्ता कदमको विरोध गर्नुभयो । त्रिविमै क्याम्पसलाई यथावत् राख्न सरकारसँग माग गर्नुभयो । सोही बैठकमा त्रिवि कर्मचारी संघका केन्द्रीय प्रतिनिधि चन्देश्वर यादवले क्याम्पसलाई गाभ्ने निर्णय दुर्भाग्यपूर्ण रहेको भन्दै निर्णय यथाशीघ्र नसच्याइए आन्दोलनमा जानुको विकल्प नरहेको बताउनुभयो ।
बैठकमा नेपाल प्राध्यापक संघ, प्रजातान्त्रिक प्राध्यापक संघ, प्रगतिशील प्राध्यापक संगठन, नेपाल राष्ट्रिय प्राध्यापक संगठन, मधेशवादी प्राध्यापक संघ, आंशिक शिक्षक संघ र त्रिवि कर्मचारी संघले उक्त निर्णयको विरोधमा ऐक्यबद्धता जनाएका छन् । हाल यस क्याम्पसमा स्थायी, निजी, करार र आंशिक गरी १२१ प्राध्यापक र ४१ कर्मचारी कार्यरत छन् ।