काठमाडौँ, २७ चैत । गृह मन्त्रालयले यसअघि गरेको परिपत्र सच्याउँदै आमाकै थरबाट बच्चको जन्मदर्ता गर्न निर्देशन दिएको छ ।

मन्त्रालयअन्तर्गतको राष्ट्रिय परिचयपत्र तथा पञ्जीकरण विभागले आइतबार देशभरका सबै वडा कार्यालयलाई सच्याएर परिपत्र पठाएको छ । नयाँ परिपत्रमा यसअघिको परिपत्रका विषयमा थप स्पष्ट पारिएको उल्लेख छ ।

नयाँ परिपत्रमा भनिएको छ, “एकल महिलाबाट जन्म भएका तर पितृत्वको ठेगाना नलागेको बच्चाको जन्मदर्ता गर्दा आमाको थर र स्थायी ठेगाना राखी जन्मदर्ता गरिदिने ।’ यसअघि मावलीको थर राख्ने भनिएको थियो ।

त्यस्तै, दोस्रो बुँदामा भनिएको छ, “विवाहअघि बच्चा जन्म भएको एकल महिलाले विवाह गरी पतिको ठेगानामा सँगै बसेको अवस्थामा आमा सूचक भइ बच्चा जन्मदा कायम भएको आमाको थर राखी हालको स्थायी ठेगानामा जन्म दर्ता गरिदिने । यदि बच्चा मावलीमा बसेको भए सोही ठेगानामा जन्मदर्ता गरिदिने ।”

यसअघि आमालाई सूचक राखी मावलीको थरबाट जन्मदर्ता गर्न निर्देशन दिएको थियो । त्यसको व्यापक विरोध भएपछि सच्याएको हो ।

विभागका महानिर्देशक रूद्रप्रसाद पण्डितले जारी गरेको ८ बुँदे परिपत्रमा बच्चाको जन्मदिने आमाको लैंगिक भूमिकालाई उच्च सम्मान गर्दै सच्याइएको जनाएको छ ।

परिपत्रमा भनिएको छ, “बच्चाको जन्मदिने आमाको लैंगिक भूमिकालाई उच्च सम्मान गर्दै नेपालको संविधानको धारा ३९ अनुसार प्रत्येक बालबालिकालाई आफ्नो पहिचानसहित नामाकरण र जन्मदर्ताको हक संरक्षण गर्न माथि उल्लिखित परिपत्रका सम्बन्धमा थप स्पष्ट गरिएको छ ।”