एजेन्सी, २२ चैत । वयस्क चलचित्र अभिनेत्री स्टोर्मी ड्यान्यल्सलाई सन् २०१६ को चुनावअघि रकम दिएकोसहित ३४ वटा मुद्दा खेपिरहेका अमेरिकी पूर्वराष्ट्रपति डोनाल्ड ट्रम्प गृहराज्य फ्लोरिडा उडेका छन् ।

मंगलबार म्यानहटनको अपराधिक अदालतमा न्यायाधीश जुआन मर्चनको इजलासमा उनीविरूद्धको मुद्दाको सुनुवाइ भएको थियो । बिहीबारको एक ग्रान्ड जुरीले ट्रम्पमाथि अभियोग चलाउने निर्णयअनुसार मंगलबार दिउँसो २ः२७ मा अदालतमा उनीविरूद्धको मुद्दाको सुनुवाइ भएको थियो ।

सुनुवाइको क्रममा अदालत पुगेर ट्रम्पले आत्मसमर्पण गरेका थिए । दिउँसो १ः३० बजे प्रहरीसामु आत्मसमर्पण गरेका उनलाई प्रहरीले ५७ मिनेट नियन्त्रणमा राखेको थियो । यद्यपि, उनलाई हतकडी भने लगाइएको थिएन ।

ट्रम्पलाई अदालतमा उनीमाथि लागेको आरोपबारे पढेर सुनाइएको थियो । त्यसपछि उनले अपराध अस्वीकार गर्दै प्रतिवादी अधिकार सुनिश्चित गर्न अदालतसँग माग गरेका थिए । ३४ विषयमा उनीविरूद्ध मुद्दा चलाइएको छ ।

५७ मिनेटको गिरफ्तारीपछि उनलाई रिहा पनि गरिएको छ । रिहापछि प्रतिक्रिया दिँदै उनले आरोप अस्वीकार गरे । त्यसपछि उनी गृहराज्य फ्लोरिडा उडेका छन् ।

अदालतमा उनीविरूद्धको मुद्दाको सुनुवाइ डिसेम्बर ४ मा तोकिएको छ । अमेरिकामा पूर्वराष्ट्रपतिविरूद्ध फौजदारी अभियोगमा मुद्दा चलेको यो पहिलो हो । आरोप पुष्टि भएमा ट्रम्पलाई ४ वर्षको सजाय हुनसक्छ ।