काठमाडौँ, १९ चैत । नेकपा (एमाले)का अध्यक्ष एवम् पूर्वप्रधानमन्त्री केपी शर्मा ओलीले एमालेलाई एक्लै पार्ने कोसिस भइरहेको बताएका छन् ।

काठमाडौँमा आयोजित पार्टीनिकट लोकतान्त्रिक आदिवासी जनजाति महासंघको राष्ट्रिय महाधिवेशनको उद्घाटन गर्दै अध्यक्ष ओलीले एमालेलाई एउटा–एउटा आउनुभन्दा एकमुष्ट आएको राम्रो भएको बताए ।

एमाले एक्लैले बहुमत ल्याएर देश बनाउन चाहेकाले देशव्यापी ग्रासरूट अभियान चलाएको उनले बताए । अध्यक्ष ओलीले आफूहरू अब गठजोडको पक्षमा नलाग्ने प्रष्ट पारे ।

उनले भने, “सबै मिल्ने एमालेलाई एक्लै पार्ने कोसिस भएको छ, मैले भनेको छु एमालेलाई एक्लै पारेको ठिक छ । एउटा–एउटा गरेर आउनुभन्दा एकमुष्टै आएको ठिक, एमाले एकातिर राष्ट्रिय शक्ति देशभक्त शक्ति एकातिर, विकासप्रेमि एकातिर अरू सबै अर्कोतिर, भेँडा जुधे झैँ जुध्दाखेरी पछाडिबाट कुदेर पछाडि ड्याम दिँदाखेरी तीन होइन सात भर्ल्याङ उछिट्याइदिनुपर्छ आगामी चुनावमा, यस्ता गठजोडको कुनै अर्थ छैन ।”

अध्यक्ष ओलीले लोकप्रिय मतमा र हरेक प्रदेशमा एमाले पहिलो शक्ति भएपनि अहिलेको निर्वाचन प्रणालीका कारण बहुमतबिना केही हुन नसक्ने र देश अगाडि बढ्न नसक्ने बताए ।