काठमाडौँ, १० फागुन । राष्ट्रपति निर्वाचनका लागि निर्वाचन आयोगले आज मतदाता नामावली प्रकाशन गर्ने तयारी गरेको छ । माघ १६ गते सार्वजनिक निर्वाचन कार्यतालिका अनुसार बुधबार बिहान १० बजेदेखि ११ बजेसम्म आयोगले मतदाताको नामावली सार्वजनिक गर्न लागेको हो ।

आयोगले दाबी विरोधको उजुरी दिने (प्रकाशित नामावलीमा नाम समावेश हुन छुट भएका व्यक्तिले आफ्नो नाम समावेश गर्नका लागि दरखास्त दिने, नाम समावेश भएको भक्तिले आफ्नो नाम, थर, उमेर, पद आदि सच्याउन दरखास्त दिने तथा प्रकाशित नामावलीमा उल्लेख भएका मतदाताको विरोधमा उजुरी दिनसमेत) आज बिहान ११ बजेदेखि बिहीबार दिउँसो १२ बजेसम्म तोकिएको छ ।

फागुन २५ गते हुने राष्ट्रपति निर्वाचनमा उम्मेदवार बन्न फागुन १३ गते मनोनयन दर्ता गर्नुपर्छ । राष्ट्रपति निर्वाचनका लागि पाटन उच्च अदालतका न्यायाधीश महेश शर्मा पौडेललाई मतदान अधिकृत तोकिएको छ ।

नयाँ बानेश्वरस्थित संघीय संसद् भवन परिसरमा दुई वटा मतदान केन्द्र हुने छन् । राष्ट्रपतिको निर्वाचनमा संघीय सांसदका दुवै सदन (प्रतिनिधिसभा र राष्ट्रियसभा)का सांसद र प्रदेशसभाका सदस्यले मात्रै मतदान गर्न पाउँछन् ।

हाल प्रतिनिधिसभामा २७४ सदस्य छन् । राष्ट्रिय स्वतन्त्र पार्टीका सभापति रवि लामिछानेको सांसद पद खारेज भएकाले एक पद रिक्त छ । राष्ट्रियसभामा ५९ जना सदस्य छन् । संघीय संसद्को ३३४ मध्ये ३३३ कायम छन् । संघीय सांसदको मतभार २६ हजार ३०७ छ ।

प्रदेशसभामा ५५० सांसद छन् । जसको मतभार २६ हजार ४०० हुन्छ । राष्ट्रपतिको निर्वाचनका लागि जम्मा मतभार ५२ हजार ७७६ छ । जसको बहुमत २६ हजार ३८९ हुन्छ ।