काठमाडौँ, ३ फागुन । बाँकेकी निर्मला कुर्मीको अपहरण, शरीर बन्धक तथा हत्यासम्बन्धधी जाहेरीमा अनुसन्धान गरेर दोषीमाथि मुघा चलाउन प्रधानमन्त्री पुष्पकमल दाहाल ‘प्रचण्ड’ले मंगलबार निर्देशन दिएपछि माइतीघरमा ४८ दिनदेखि जारी आन्दोलन स्थगित भएको छ ।
कुर्मीलाई न्याय दिलाउन आन्दोलन गर्दै आएकी अभियन्ता रूबी खानले मंगलबार साँझ माइतीघर पुगेर सरकारसँग भएको सहमतिबारे जानकारी दिएकी थिइन् ।
माइतीघर मण्डलामा लालटिन बालेर धर्ना दिँदै तेस्रो चरणको आन्दोलन चलेको थियो । रूबी खानले उक्त लालटिन निभाउँदै हाललाई आन्दोलन स्थगनको घोषणा गरिन् ।
प्रधानमन्त्री प्रचण्डले मंगलबार बिहान कुर्मीको न्यायका लागि आन्दोलनरत पक्षसँग वार्ता गरेका थिए । गृह सचिव विनोदप्रकास सिंह र प्रहरी महानिरीक्षक धिरजप्रताप शाहसमेत सहभागी उक्त वार्तामा ३ बुँदे सहमति भएको छ ।
सहमतिअनुसार कर्मीको अपहरण, शरीर बन्धक तथा हत्यासम्बन्धी जाहेरीमा अनुसन्धान गर्न विशेष अनुसन्धान टोली गठन गरिने भएको छ । उक्त टोलीले घटनाको विस्तृत अनुसन्धान गरी दोषीउपर मुद्दा चलाउने सहमतिको पहिलो बुँदामा उल्लेख छ ।
सहमतिको दोस्रो बुँदामा आन्दोलनरत पक्षले अनुसन्धान प्रक्रियाको समीक्षा गर्ने गरी न्यायिक जाँचबुझ आयोगको माग यथावत् राख्नै हाललाई तेस्रो चरणको आन्दोलन स्थगित गर्ने भनिएको छ ।
त्यस्तै, तेस्रो बुँदामा आन्दोलनरत पक्षका व्यक्तिको जिउज्यान सुरक्षाका लागि उचित समन्वय र प्रबन्ध गर्ने उल्लेख छ ।
सहमतिमा आन्दोलनरत पक्षबाट रूबी खानले हस्ताक्षर गरेकी छन् भने सरकार तर्फबाट गृह मन्त्रालयका सहसचिव तथा प्रवक्ता जितेन्द्र बस्नेतले हस्ताक्षर गरेका छन् ।
यसअघि पनि कुर्मीको अपहरण तथा हत्या प्रकरणमा छानबिन हुने भनेर सरकारले भनेपछि नेपालगञ्जदेखि काठमाडौँ आएर आन्दोलन गरेका अभियन्ता फर्केका थिए । तर, सहमतिविपरीत सरकारले दोषीमाथि मुद्दा चलाउन नखोजेपछि अभियन्ताहरू फेरि काठमाडौँ आएका थिए ।
प्रतिक्रिया दिनुहोस्