वालिङ, २ फागुन । नेपाली कांग्रेसका केन्द्रीय उपसभापति एवं प्रतिनिधिसभा सदस्य धनराज गुरुङले जनतामाझ बाचा नभई महसुस दिलाउने गरी काम गर्नुपर्ने बताएका छन् ।
स्याङ्जाको वालिङमा आयोजित श्रीमद्भागवत सप्ताह ज्ञान महायज्ञ एवं गौ संरक्षण महायज्ञ–२०७९ को उद्घाटन गर्दै उनले बाचाभन्दा पनि जनताले महसुस हुने काम वा परिवर्तन चाहेको बताएका हुन् ।
“जनतामाझ जे गर्न सकिन्छ त्यही मात्रै बोल्नुपर्छ र बोलेका कुरा पूरा पनि गर्नुपर्छ”, उनले भने, “जनतालाई झुटा आश्वासन मात्रै बाँड्नु हुन्न भन्ने पक्षमा म छु, जे गर्नसक्छु त्यही बोल्छु, नसक्ने बोल्दिनँ ।”
जनताले नेतृत्वबाट महसुस हुने गरी देखिने गरी परिवर्तनको अपेक्षा गरेकाले जनताका चाहनालाई सकिने जति सम्बोधन गर्नुपर्नेमा उनको जोड छ । “म जनतामाझ कुनै बाचा गरेर जान्नँ, केही वाचा गर्दिनँ”, उनले भने, “जे सक्छु त्यो महसुस दिलाउने र देखिने गरी गर्छु, त्यो काम सकिएपछि मात्रै देखिन्छ ।”
उनले आमासमान रहेकी गौमाताको संरक्षण गर्नका लागि आयोजना गरिएको महायज्ञको सफलताको शुभकामना व्यक्त गर्दै आफ्नोतर्फबाट जे सकिन्छ त्यही सहयोग गर्ने बताए ।
प्रतिक्रिया दिनुहोस्