एजेन्सी, १७ माघ । कोरोना भाइरसको संक्रमण रोकथामका लागि अमेरिकाले लगाएको राष्ट्रिय आपतकाल आगामी मे ११ देखि अन्त्य गर्ने भएको छ ।

अमेरिकी राष्ट्रपति जो बाइडेनले सोमबार कंग्रेसलाई दिएको जानकारीअनुसार आगामी ११ मेबाट तीन वर्षदेखि देशमा जारी कोभिड–१९ रोकथामका लागि लगाइएका दुई वटा आपतकाल अन्त्य गर्न लागेका हुन् ।

पछिल्लो समय विश्वका अधिकांश मानिसहरू सामान्य अवस्थामा फर्किएको भन्दै ह्वाइटहाउसले राष्ट्रिय आपतकाल र सार्वजनिक स्वास्थ्य आपतकाल घोषणा अन्त्य गर्न लागेको हो ।

तत्कालीन राष्ट्रपति डोनाल्ड ट्रम्प सरकारले ३१ जनवरी २०२० मा पहिलो पटक सार्वजनिक स्वास्थ्य आपतकाल घोषणा गरेको थियो । त्यसपछि मार्चमा ट्रम्पले कोभिड–१९ महामारीलाई राष्ट्रिय आपतकाल घोषणा गरेका थिए ।

सन् २०२१ को जनवरीदेखि पदभार ग्रहण गरेका बाइडेनले आपतकालीन अवस्थाहरू बारम्बार विस्तार गर्दै गएका थिए ।