डोटी, १० माघ । राष्ट्रियसभा सदस्यमा प्रदेश नम्बर ७ बाट ६ जना निर्विरोध निर्बाचित बनेका छन् । वाम गठबन्धनका तर्फबाट एमालेका ३ माओवादीबाट १ गरि ४ जना तथा कांग्रेसका दुई जना उम्मेदवार निर्विरोध निर्वाचित भएका छन् ।
खुल्ला तर्फमा एमालेका शेरबहादुर कुँवर, माओवादी केन्द्रका हरिराज चौधरी र नेपाली कांग्रेसका बद्री पाण्डे निर्विरोध भएका हुन भने महिलातर्फ एमालेकै इन्दु कडरिया र कमला वली तथा नेपाली कांग्रेसका तर्फबाट तारा भट्ट निर्विरोध निर्बाचित भएकि छिन् ।
माघ १४ गतेसम्म उम्मेदवार माथि दाबी विरोध गर्ने पाइने भएकाले अहिले नै विजयी घोषणा गर्न नसकिने निर्वाचन आयोगले जनाएको छ । आयोगले यसको औपचारिक घोषणा १४ गतेपछि मात्र गर्ने छ ।
अब ७ नम्बर प्रदेशबाट राष्ट्रियसभामा अल्पसंख्यक एक सिटका लागि २ र दलित एक सिटका २ जनाबिच माघ २४ गते मतदान हुने छ ।
अल्पसंख्यक सिटका लागि वाम गठबन्धनका तर्फबाट माओवादी केन्द्रका महेशकुमार महरा र कांग्रेसका चक्रराज जोशीबीच प्रतिस्पर्धा हुनेछ । दलित सिटका लागि वाम गठबन्धनका तर्फबाट माओवादी उम्मेदवार चक्रप्रसाद स्नेही र कांग्रेसका शेरीराम पार्कीबीचको प्रतिस्पर्धा हुनेछ ।
प्रतिक्रिया दिनुहोस्