काठमाडौं, १६ वैशाख । ह्वाइट हाउसले अमेरिकी राष्ट्रपति  डोनाल्ड ट्रम्पको नयाँ मेडिकल रिपोर्ट सार्वजनिक गरेको छ। रिपोर्टअनुसार आगामी १४ दिनमा ८० वर्ष पुग्न लागेका ट्रम्पको स्वास्थ्य अवस्था समग्रमा “उत्कृष्ट” रहेको उल्लेख गरिएको छ।

मेडिकल विवरणअनुसार ट्रम्पले हाल कोलेस्ट्रोल र मुटुसम्बन्धी समस्याका लागि तीन प्रकारका औषधि नियमित सेवन गरिरहेका छन्। तीमध्ये ‘रोसुभास्टाटिन’ र ‘एजेटिमिब’ कोलेस्ट्रोल नियन्त्रणका लागि हुन् भने कम डोजको ‘एस्पिरिन’ मुटु रोगको जोखिम घटाउन प्रयोग गरिन्छ।

ह्वाइट हाउसका चिकित्सक डा. सन पी. बार्बाबेलाले ट्रम्पको मुटु, फोक्सो र स्नायु प्रणाली सबै “बलियो र स्वस्थ” रहेको उल्लेख गर्दै उनलाई राष्ट्रपति जिम्मेवारी निर्वाह गर्न पूर्ण रूपमा सक्षम रहेको बताएका छन्। रिपोर्टमा उनको संज्ञानात्मक तथा शारीरिक क्षमता पनि उत्कृष्ट रहेको दाबी गरिएको छ।

मंगलबार ‘वाल्टर रिड नेसनल मिलिटरी मेडिकल सेन्टर’ मा गरिएको चेकअपमा २२ जना विशेषज्ञ डाक्टरहरूले विभिन्न परीक्षण गरेका थिए। सीटी स्क्यान, हार्ट इमेजिङ, क्यान्सर स्क्रिनिङसहितका विस्तृत परीक्षण गरिएको रिपोर्टमा उल्लेख छ।

रिपोर्टअनुसार ट्रम्पको तौल हाल २३८ पाउन्ड (करिब १०८ किलो) पुगेको छ, जुन अघिल्लो वर्षको तुलनामा बढेको हो। उचाइ ६ फिट ३ इन्च रहेको जनाइएको छ। चिकित्सकहरूले उनलाई तौल घटाउन, स्वस्थ खानपान अपनाउन र शारीरिक गतिविधि बढाउन सुझाव दिएका छन्।

उनको हातमा देखिएका निशानबारे रिपोर्टमा स्पष्ट पारिएको छ कि बारम्बार हात मिलाउने र एस्पिरिन सेवनका कारण हल्का डाम देखिएको हो। तर केही स्वतन्त्र चिकित्सकहरूले यो व्याख्यामाथि प्रश्न उठाएका छन्।

रिपोर्टले खुट्टामा हल्का सुन्निने समस्या देखिएको भए पनि अघिल्लो वर्षको तुलनामा सुधार भएको उल्लेख गरेको छ। यसअघि उनलाई ‘क्रोनिक भेनस इन्सफिसियन्सी’ नामक उमेरसँग सम्बन्धित रक्तसञ्चार समस्या रहेको बताइएको थियो।

चर्चित मेडिकल रिपोर्टमा ट्रम्पको “कार्डियाक एज” वास्तविक उमेरभन्दा करिब १४ वर्ष कम रहेको दाबी पनि गरिएको छ, जसलाई केही विशेषज्ञहरूले असामान्य मेडिकल प्रस्तुति भनेका छन्।

ट्रम्पले भने सामाजिक सञ्जालमा आफ्नो चेकअप “पूर्ण रूपमा उत्कृष्ट” रहेको दाबी गर्दै कुनै गम्भीर स्वास्थ्य समस्या नरहेको बताएका छन्।