गुल्मी, ९ माघ । मंसिर २१ गते भएको प्रतिनिधि तथा प्रदेश सभा निर्वाचनमा गुल्मीबाट उम्मेद्धार भएका १० जनाले अझैसम्म पनि निर्वाचन खर्च विवरण बुझाएका छैनन् । मतपरिणाम घोषण भएको ३५ दिनसम्म सबै उम्मेद्धारहरुले निर्वाचन खर्च विवरण बुझाउनुपर्ने भएपनि गुल्मीका १० जना स्वतन्त्र उम्मेद्धारले अझैसम्म पनि खर्च विवरण बुझाएका छैनन् ।

निर्वाचन खर्च विवरण नबुझाउनेहरुमा सबै स्वतन्त्र उम्मेद्धारहरु रहेका छन् । प्रतिनिधिसभा निर्वाचन क्षेत्र नम्बर १ बाट उम्मेद्धार बनेका दोमोदर भण्डारी र लक्ष्मण भण्डारीले खर्च विवरण बुझाएका छैनन् ।

क्षेत्र नम्बर १ को प्रदेश १ बाट पनि ३ जनाले निर्वाचन खर्च विवरण बुझाएका छैनन् । यसरी खर्च विवरण नबुझाउनेहरुमा कृष्ण थापा, दिना नाथ ज्ञवाली र रेसम राज न्यौपाने रहेको जिल्ला निर्वाचन कार्यलय गुल्मीका प्रमुख गणेश खत्रीले जानकारी दिए ।

त्यस्तै प्रतिनिधिसभा निर्वाचन क्षेत्र नम्बर २ बाट पनि चुरामणी भण्डारीले बुझाएका छैनन् । क्षेत्र नम्बर २ को प्रदेश १ बाट धनिश्वर गौतम र सन्तोष कुँवर तथा क्षेत्र नम्बर २ को प्रदश २ बाट विष्णु सुनार र तेज बहादुर बोहोराले पनि निर्वाचन खर्च नबुझाएको खत्रीले बताए ।

उचित कानुन नभएकोले खर्च विवरण नबुझाउनेलाई हुने कारवाहीको विषयमा पनि केहि जानकारी नभएको जिल्ला निर्वाचन कार्यलयले जनाएको छ । यद्यपी उनीहरुलाई केन्द्रको निर्वाचन आयोगले कारवाही गर्न सक्ने कार्यलय प्रमुख खत्रीले बताए ।

विजयीमध्ये प्रतिनिधिमा विष्ट र प्रदेशमा बरालले गरे धेरै खर्च

२ प्रतिनिधिसभा र ४ प्रदेशसभामा उम्मेद्धारी दिएका कुल ५२ जनामध्ये ४२ जनाले निर्वाचन खर्च विवरण बुझाएका छन् । विजयी उम्मेद्धारमध्ये प्रतिनिधिसभा क्षेत्र नम्बर २ का उम्मेद्धार गोकर्ण विष्टले धेरै खर्च गरेको पाइएको छ ।

विष्टले २२ लाख ७४ हजार खर्च गरेका छन् भने क्षेत्र नम्बर १ का विजय उम्मेद्धार प्रदिप ज्ञवालीले १८ लाख १ सय ७० खर्च गरेको जिल्ला निर्वाचन कार्यलयले जानकारी दिएको छ ।

त्यस्तै प्रदेशसभातर्फ विजयी उम्मेद्धारमध्ये सबैभन्दा धेरै क्षेत्र नम्बर १ प्रदेश १ का सुदर्शन बरालले खर्च गरेका छन् । बरालले १४ लाख ९२ हजार २ सय ६६ खर्च गरेका छन् ।

त्यस्तै क्षेत्र नम्बर १ प्रदेश २ का सासंद कमलराज श्रेष्ठले ८ लाख ९२ हजार २ सय ८० खर्च गरेको पाइएको छ । क्षेत्र नम्बर २ प्रदेश १ का सासंद खड्ग केसीले १४ लाख ४० हजार र प्रदेश २ का सासंद दिनेश पन्थीले १४ लाख १६ हजार ३ सय ७६ खर्च गरेको जिल्ला निर्वाचन कार्यलयले जनाएको छ ।

गुल्मीका २ प्रतिनिधिसभा र ४ प्रदेशसभा सबैमा एमाले र माओवादी केन्द्रको बाम गठबन्धनले जित हात पारको थियो ।

काङ्ग्रेसबाट प्रतिनिधिमा भण्डारी र प्रदेशमा पहराईले गरे धेरै खर्च

निर्वाचनमा सबै स्थानमा नेपाली काङ्ग्रेस प्रमुख प्रतिद्धन्द्धि रहेको थियो । काङ्ग्रेबाट प्रतिनिधिसभामा सबैभन्दा धेरै क्षेत्र नम्बर १ का उम्मेद्धार चन्द्र भण्डारीले गरेका छन् । भण्डारीले कुल २४ लाख २५ हजार खर्च गरेको विवरण निर्वाचन कार्यलयमा पेश गरेका छन् ।

त्यस्तै क्षेत्र नम्बर २ का उम्मेद्धार चन्द्र केसीले २४ लाख १७ हजार ५ सय खर्च गरेको पाइएको छ । काङ्ग्रेसबाटै प्रदेशसभामा उम्मेद्धार बनेकामध्ये सबैभन्दा धेरै क्षेत्र नम्बर २ प्रदेश २ का छन्दबहादुर पहाराईले गरेका छन् । पहराईले खर्च गर्न पाउने कुल रकम १५ लाख सबै नै खर्च गरेको विवरण पेश गरेका छन् ।

त्यस्तै क्षेत्र नम्बर १ प्रदेश १ का उम्मेद्धार पृथ बहादुर फौजदारले १४ लाख ८३ हजार १ सय र प्रदेश २ का उम्मेद्धार धनेन्द्र कर्कीले १४ लाख ७६ हजार ८ सय खर्च गरेको पाइएको छ भने निर्वाचन क्षेत्र नम्बर २ को प्रदश १ का उम्मेद्धार शालिकराम पन्थीले १४ लाख ७५ हजार निर्वाचन खर्च विवरण बुझाएको जिल्ला निर्वाचन कार्यलयले जनाएको छ ।

एबीसी रिर्पोटर हुमाकान्त पोखरेल