डोटी, ५ माघ ।सरकारकाले अस्थायी मुकाम तोके सगै डोटीको जिल्ला सदरमुकाम सिलगढीमा शुक्रबार प्रादेशिक राजधानीको माग गर्दै आएका आन्दोलनकारी र प्रहरीका बीचमा झडप भएको छ । झडपका क्रममा एक दर्जन बढी आन्दोलनकारी र ५ जना प्रहरी घाइते भएका छन् ।

झडपमा एमाले डोटीका अध्यक्ष चक्रबहादुर मल्ल, दिपायल सिलगढी नगरपालिकामा मेयर मञ्जु मलासी, सायल गाउँपालिकाका उपाध्यक्ष बिस्ना सिंह, माओवादी केन्द्रका केन्द्रीय सदस्य जर्नादन जोशी, आन्दोलनकारी सुशील घर्ती, शेरबहादुर मल्ल, मेरिना श्रेष्ठ, विजयराज ओझा सहितका एक दर्जन बढी आन्दोलनकारी घाइते भएका छन् ।

झडपमा प्रहरी निरीक्षक भिमदत्त जोशीसहित ५ जना प्रहरी घाइते भएको जिल्ला प्रहरी कार्यालय डोटीका प्रहरी प्रमुख मधुसुधन लुँइटेलले जानकारी दिए । घाइतेमध्ये दुई जना प्रहरीको जिल्ला अस्पताल डोटीमा उपचार भैरहेको छ ।

प्रदर्शनकारीले जिल्ला प्रशासन कार्यालयमा सुरक्षामा रहेका प्रहरीमाथि ढुङ्गा प्रहार गरेपछि प्रहरीले स्थिति नियन्त्रणमा लिन ३ दर्जनभन्दा बढी अश्रु ग्यास प्रहार गरेको छ ।
प्रदर्शनकारीले डोटीमा रहेका सम्पूर्ण सरकारी कार्यालयमा कालो झण्डा गाडेका छन् । प्रदर्शनकारीले डोटी जिल्लाको सरकारी कार्यालयका बोर्ड फालिएको फ्यालेका छन् । जिल्ला वन, जिल्ला पशु सेवा, निर्वाचन कार्यालय, जिल्ला नापीको नव निर्मित भवनमासमेत प्रदर्शनकारीले तोडफोड तथा आगजनी गरेका छन्