काठमाडौं, १७  चैत ।  कोरोना भाइरसको सक्रमणबाट जोगिन सरकारले गरेको ‘लकडाउन’को पाल्पामा पालना गरिएको छ । लकडाउनबाट जिल्लाको जनजिवन प्रभावित त बनेको छ तर महामारी फैलाउने भाइरसको संक्रमणबाट जोगिन मानिसले लकडाउनलाई स्वीकार गरेका छन् । अत्यावश्क काम बाहेक कोहीपनि घरबाहिर निस्केका छैनन् । निस्किएका व्यक्तिहरु समेत माक्स लगाएर मात्र औषधी पसल तथा दूध डेरीसम्म मात्र पुगेका छन् । पाल्पा जिल्लाका दशैवटा स्थानीय तहले विभिन्न देशबाट आएका नागरिकको उच्च निगरानी राखेका छन ।

लकडाउनको कारण तानसेनका सबै व्यापारी पसल, उद्योगधन्दा पूर्ण रुपमा बन्द रहेका छन् भने चोक–चोकमा प्रहरी परिचालन भएका छन् । विश्वभर फैलिएको कोभिड–१९ को त्राससँगै भारत लगायत तेस्रो मुलकबाट जिल्लामा आएका एक हजार ५० जनालाई उच्च निगरानीमा राखिएको छ । जिल्लाका स्थानीय तहरुले आ–आफ्ना स्थानका नागरिकहरुलाई कोरोना भाइरसको सक्रमणबाट बच्न र बचाउन उच्च निगरानीमा राखेको र क्वारेन्टाईन निमार्ण गरेर काम गरेको रिब्दीकोट गाउँपालिकाका प्रमुख प्रशासकीय अधिकृत ऋषिराम अर्यालको भनाई छ ।

पाल्पामा बाहिरी मुलुकबाट आएका व्यक्तिहरुमा कोरोनाको संक्रमण उच्च रहने सम्भावना भएकाले स्थानीय तहहरुले होम क्वारेन्टाइनमा राखेर उनीहरुको उच्च निगरानी बढाएका छन । जिल्लाका १० वटै स्थानीय तहहरुले छुट्टाछुट्टै क्वारेन्टाइनको व्यवस्था मिलाएका छन् । जिल्लाको रैनादेवी छहरा गाउंपालिकामा जिल्लामै धेरै नागरिक भारतबाट आएका छन् । उनिहरुको सुरक्षामा खटिएको रैनादेवी छहराका प्रमुख प्रसासकिय अधिकृत खेत बहादुर खत्रीले जानकारी दिनु भयो ।

कोरोना भाइरसको उच्च जोखिम रहेकाले सरकारले सतर्कता अपनाउदै देशका विभिन्न सीमाहरु बन्द गरे पनि नेपाली नागरिकहरु गाउँ आउने क्रम रोकिएको छैन । पाल्पाबाट विभिन्न सीमा नाका हुँदै १ हजार ५० जना नागरिक जिल्ला प्रवेश गरेका छन् । जिल्लाको तानसेन रामपुर, बगनासकाली रम्भा, पुर्वखोला, तिनाउ, रैनादेवी छहरा, रिब्दीकोट, माथागढी र निस्दी गाउँमा भारत लगायत तेस्रो मुलुकबाट आएका १ हजार ५० जनालाई कोरोना भाइरसको सक्रमणबाट बच्न बचाउन उच्च निगरानीमा राखिएको छ ।

जिल्लाका दश वटा स्थानीयतहरुले ३ सयको हाराहारीमा क्वारेन्टाइन निर्माण गरे पनि ४७ वटा क्वारेन्टाइन बेड मात्र प्रयोगमा आएका छन् । पाल्पामा लकडाउनको पालना नर्गने केही युवा भने प्रहरीको कारवाहीमा समेत परेका छन । जिल्लामा खाद्यान्न, डिजेल, पेटोल र ग्यासको अभाव देखिन थालेको छ ।