काठमाडौं, १६ चैत । चीन हुँदै विश्वभर फैलिएको कोरोना भाइरस कोभिड–१९ संक्रमणबाट विश्वभर ज्यान गुमाउनेको संख्या ३१ हजार भन्दा बढि रहेको छ । पछिल्ला दिनमा चिनमा संक्रमणदर घट्दै गए पनि अन्य देशमा भने फैलिइरहेको छ । चिनपछि सबैभन्दा बढि संक्रमण इटालीमा देखिएको छ । पछिल्लो विवरणअनुसार कोरोना भाइरस अर्थात कोभिड नाइन्टिनका कारण मृतकको संख्या ३१ हजार भन्दा बढि रहेको छ भने भाइरसबाट ६ लाख ७२ हजार भन्दा बढि रहेको छ ।

संक्रमितमध्ये २५ हजार तीन सय ७७ जनाको अवस्था गम्भीर छ । त्यसैगरी करिब १ लाख ४३ हजार भन्दा बढि उपचार पछि घर फर्किका छन् । गत डिसेम्बरमा चीनको बुहान प्रान्तमा देखिएको यसको संक्रमण सयभन्दा बढी देशमा देखिसकेको छ । पछिल्लो नतिजा अनुसार अमेरीकामा कोरोना संक्रमणका बिरामी धेरै देखिएका छन् ।

अन्य देशमा संक्रमणको संख्या बढि रहदा डिसेम्बर अन्तिममा भाइरस संक्रमण देखिएयता शनिबार चीनभर मात्र ४५ जना नयाँ संक्रमित भेटिएका छन् । जसमध्ये एकजना बाहेक सबै विदेशबाट फर्किएका व्यक्ति रहेको त्यहाका संचार माध्यमले जनाएका छन् । चीनको राष्ट्रिय स्वास्थ्य आयोगले जारी गरेको पछिल्लो ७ दिनको तथ्यांकलाई हेर्ने हो भने, चीनभर ३ सय १३ जना बाहिरबाट आयातित संक्रमित पाइएकामा मात्र ६ जना घरेलु संक्रमित छन् ।

आयातित संक्रमितमध्ये अधिकांश विदेशबाट फर्किएका चिनियाँ नागरिक नै छन् । कोरोना भाइरसको उद्गमस्थल हुबेई प्रान्तको राजधानी वुहानमा पछिल्लो १० दिनमा मात्र एक जना नयाँ संक्रमित पुष्टि भएको राष्ट्रिय स्वास्थ्य आयोगले उल्लेख गरेको छ । चीनभर मृतकको संख्यामा पनि उल्लेख्य कमी आएको छ । शनिबार थप ५ जनाको मात्र मृत्यु भएको छ । मृत्यु हुने पाँचैजना वुहानकै हुन् । हुबेई प्रान्तमा लगातार चौथो दिन शनिबार पनि नयाँ संक्रमित भेटिएको छैन ।

पछिल्लो चार दिनभित्र मात्र एकजना मात्र घरेलु संक्रमित पाइएको छ, त्यो पनि हुबेईको सीमावर्ती हेनान प्रान्तमा । चीनमा घरेलु संक्रमित संख्या लगभग शून्यमा पुग्दै गर्दा केही आयातित संक्रमित देखिएपछि उसले कडा कदम चालिसकेको छ । आइतबारबाट लागू हुने गरी अन्तर्रा्ष्ट्रिय उडान बन्द गरिएका छन् भने शनिबारबाटै विदेशीलाई मुख्यभूमि चीनतर्फ प्रवेशमा रोक लगाइसकिएको छ । संक्रमण दर घट्दै गएपछि अढाई महिनाभन्दा बढी अवधिसम्म ‘लकडाउन’ रहेको वुहान आंशिक रूपमा खुला गरिएको छ ।

सहर भित्रने सडक र रेल सञ्जाल शनिबारबाट सुचारु गरिएका छन् । तर वुहानबाट बाहिरिन भने अझै पनि प्रतिबन्ध लगाइएको छ । जनवरी १५ मा ‘लकडाउन’ गरिएपछि पहिलोपटक शनिबार रेलमार्ग हुँदै ६० हजारभन्दा बढी चिनियाँ वुहान पुगेका छन् । आइतबारबाट तिहानी विमानस्थलबाहेक वुहानका सबै विमानस्थलले केही आन्तरिक उडान सुचारु गरेका छन् । तिहानी विमानस्थल आउँदो अप्रिल ८ बाट सुचारु हुने जनाइएको छ । हुबेईबाट बेइजिङको उडान भने स्थगित छ ।

‘अहिले वुहानको वातावरण सुखद् छ । संक्रमण फैलिएका बेलाजस्तौ मानिस आतंकित छैनन् । महामारीको अवस्था निकै डरलाग्दो थियो, तर अहिले त्यस्तो अवस्था छैन,’ हु थरका एक वुहानवासीले समाचार संस्था रोयटर्ससँग भने, ‘अहिलेको अवस्था नियन्त्रणमा छ ।’ हुबेई सरकारले आइतबार आफ्नो आधिकारिक ‘वीच्याट’ अकाउन्टमार्फत अढाई महिनाभन्दा लामो समयदेखि बन्द वुहानस्थित कैयौं सपिङ मल सोमबारबाट खुला गर्न दिइने जनाएको छ । चीनभर हालसम्म ८२ हजार ६१ जना कोभिड–१९ संक्रमित पुष्टि भएकोमा ३ हजार ३ सय ४ जनाको मृत्यु भएको छ भने ७५ हजार ५ सय ७६ जनाको उपचारपछि निको भइसकेका छन् ।