काठमाडौं, २६ मंसिर । इन्टरनेटले संसारलाई साघुँरो बनाएको छ । इन्टरनेटको उच्चतम प्रयोग नेपालमा पनि हुन थालेको छ । तर,यसले विकृति र विसंगति पनि उत्तिकै भित्र्याएको छ । इन्टरनेटको तीव्र विकाससंगै अपराधिक क्रियाकलाप पनि बढिरहेको छ । पछिल्लो समय बैंक तथा वित्तिय संस्थाहरु ह्याक गरेर रकम चोर्ने क्रम बढिरहेको छ । केही समय अघि बैंकको एटिएम ह्याक गरेर करोडौँ रुपैँया रकम चोर्दा चोर्दै चिनियाँ नागरिक पक्राउ हुन् । फेसबुक, भाइबर, आइ एम ओ, ह्वाट्सएप लगायतको गलत प्रयोगबाट पनि आर्थिक तथा सामाजिक अपराध हुदै आएका छन् । यस्तै भाइबर, इमो लगायतका सामाजिक सञ्जालको प्रयोग गरि ठगि गर्ने गिरोहलाई प्रहरीले पक्राउ गरेको छ ।

भाइबर, इमो, ह्वाट्सएप, फेसबुकका माध्यमबाट चिठ्ठा परेको, पार्सल आएको छ भन्दै ठगि गर्ने गिरोहलाई महानगरिय अपराध महाशाखाको विशेष अनुसन्धान टोलीले पक्राउ गरेको हो । पक्राउ पर्नेमा दोलखाका वर्ष ५२ का रमेश खड्का, नवलपरासीका वर्ष ३७ का विशेश्वर प्रसाद तिवारी र सोही ठाउँका संदिप कलवार रहेका छन् । पक्राउ परेका उनीहरुको सम्बन्ध नाइजेरियन नागरिक पिटर हेर्मन र बेलायती स्मिथ मोरिससँग रहेको प्रहरीले जनाएको छ । अनलाइन ठगिमा १० जना भारतीय नागरिक पनि संलग्न रहेको प्रहरीले जनाएको छ । सामाजिक सञ्जाल मार्फत ठगि धन्दा चलाउँदै आएका उनीहरुले विभिन्न बैंक तथा वित्तिय संस्थाहरु समेत ह्याक गरेको अनुसन्धानबाट खुलेको महानगरिय अपराध महाशाखाले जानकारी दिएको छ।

पिटर र स्मिथले नेपालका ठगीका लागि मात्र ४० भन्दा बढी एजेन्ट परिचालन गरेको प्रहरीको प्रारम्भिक अनुसन्धानबाट खुलेको छ । यसअघि कृषि विकास बैंक र पानस रेमिट ह्याकिङ प्रकरणमा उनीहरुको संलग्नता रहेको प्रहरीको ठम्याइ छ ।। नेपालमा ४० भन्दा बढी एजेण्टहरु रहेको र उनीहरुले अहिलेसम्म १५ देखि २० प्रतिशत कमिसन खाएर बाँकी रकम भारत पठाउने गरेका थिए । उनीहरुले नेपालका विभिन्न १७ वटा बैंकहरुबाट अहिलेसम्म १७ करोड ६७ लाख ९१ हजार रुपैयाँको कारोबार गरेको खुलेको एसएसपी थापाले बताए । थापाले अहिलेसम्म ३४ जना नेपालीहरु अनलाइन ठगिमा संलग्न रहेको र १५ जना अनलाईनबाट ठगि पीडितहरु प्रहरीको संम्पर्कमा आएको बताए । एजेण्टहरुले ठगि गरेर कारोबार गरेका बैंकहरुमा ह्याक हुन सक्ने सम्भावना रहेको भन्दै प्रहरीले अनुसन्धान गरिरहेको छ ।

नेपालमा यो प्रकारको घटना बारम्बार घटिरहेको छ । आम नागरिकहरु ठगिने क्रम रोकिएको छैन सामाजिक सञ्जालको चरम दुरुपयोग भएको छ । हाम्रा बैंक तथा वित्तिय संस्था समेत असुरक्षित बन्दै गएका छन् । यसर्थ सूचना प्रविधिको चरम दुरुयोग गरि आम नागरिकलाई ठगी गर्ने यस्ता गिरोहरुको संयन्त्रलाई भत्काउन प्रहरीले थप कार्यकुशलता देखाउन आवस्यक छ भने, सर्वसाधारणहरु पनि वास्तविक सत्य तथ्य बुझेर मात्रै यस्ता प्रलोभनबाट सचेत हुन आवस्यक छ ।