पाँचथर | युट्युबमार्फत प्रधानमन्त्री बालेन्द्र शाह लगायत नेताहरूलाई लक्षित गर्दै अपमानजनक तथा गालीगलौजयुक्त सामग्री प्रसारण गरेको आरोपमा पाँचथरबाट एक जना युट्युबर पक्राउ परेका छन्।

पक्राउ पर्नेमा पाँचथरको फाल्गुनन्द गाउँपालिका–७ निवासी रोशन पोखरेल रहेका छन्। उनलाई नेपाल प्रहरी को साइबर ब्युरोको अनुसन्धानका आधारमा जिल्ला प्रहरी कार्यालय पाँचथरले नियन्त्रणमा लिएको हो।

प्रहरीका अनुसार ‘Hades’ नामक युट्युब च्यानलमा प्रसारित सामग्रीका आधारमा अनुसन्धान अघि बढाइएको थियो। सोही सामग्रीमा सार्वजनिक पदमा रहेका व्यक्तिहरूविरुद्ध अपमानजनक अभिव्यक्ति प्रयोग गरिएको आरोप छ।

पाँचथरका प्रहरी प्रमुख डीएसपी अनिश कर्णका अनुसार, पक्राउ परेका पोखरेललाई जिल्ला अदालत पाँचथरबाट १० दिनको म्याद थप गरी साइबर अपराधसम्बन्धी कसुरमा अनुसन्धान भइरहेको छ।

यस घटनाले सामाजिक सञ्जालमा अभिव्यक्ति स्वतन्त्रता र त्यसको सीमाबारे पुनः बहस सुरु गराएको छ। प्रहरीका अनुसार, डिजिटल प्लेटफर्ममा सामग्री प्रकाशन गर्दा प्रचलित कानुनको पालना अनिवार्य हुने र उल्लङ्घन गरेमा कारबाही हुने स्पष्ट सन्देश दिइएको छ।