बुटवल, २३ चैत्र ।
नयां शक्ति पार्टीका संयोजक डाक्टर बाबुराम भट्टराईले संबिधानमा लेखिन बांकी रहेको कार्यभार पुरा गर्न नेपालमा आदिबासी जनजाती, दलित र उत्पीडीत जाती समुदायले फेरी संघर्ष गर्ने बेला आएको बताउनु भएको छ ।
नयांशक्ति सम्बद्ध मगर राष्ट्रिय परिषदको प्रथम राष्ट्रिय भेलाको आज बुटवलमा उद्घाटन गर्दै संयोजक भट्टराईले तत्कालीन माओबादी बाहेकका दलहरुले नमानेका कारण संबिधानमा कतिपय बिषयहरु अधुरो रहेको बताउंदै त्यसलाई पुर्णता दिन उत्पीडित बर्गले आन्दोलन गर्न आवश्यक रहेको बताउनु भयो ।
उहांले कांग्रेस र एमालेले सुरुमा १० प्रदेशको मोडेलमा सहमती गरेपनि संबिधान निर्माण गर्दा नमानेको आरोप लगाउनु भयो । संबिधान नै बन्न नदिने षडयन्त्रलाई चिर्न आफुहरुले ७ प्रदेशको मोडल स्विकार गरेको उहांको भनाई छ । दलहरुले १० प्रदेश सहितको मोडेल छाडेका कारण नेपालमा आदिवासी जनजातीका अधिकार गुमेको डाक्टर भट्टराईले बताउनु भयो
१० प्रदेशको मोडल अहिले पनि सान्दर्भिक रहेको भन्दै आदिबासी, जनजाती, दलित, महिला लगायतका बर्गले समावेशी मोडेलका लागि संघर्ष जारी राख्न भट्टराईले आह्वान गर्नु भयो ।
नेता भट्टराईले बिगत जनयुद्धमा मगर र थारु समुदायको सबैभन्दा बढी योगदान रहेको चर्चा गर्दै पार्टीले तीनीहरुको अधिकार खोस्न सम्झौता गरेपछि आफ्नो माओबादी पार्टीसंग मोह भंग भएको बताउनु भयो ।
उत्पीडीत र श्रमजीवी वर्गको संघर्षबाट मात्र मुक्ति सम्भव नभएको बताउंदै उहांले मुक्तिकालागि अन्य बर्गले पनि सर्वहारा र श्रमजिवी बर्गको संघर्षलाई सघाउनु पर्ने बताउनु भयो । उहांले हिजो संघर्ष गरेकाहरु यतिबेला सत्ताको चास्नीमा डुबेको आरोप लगाउंदै मुक्तिको बाटो र सत्ताको चास्नी संगै अगाडी बढ्न नसक्ने टिप्पणी गर्नुभयो ।
कार्यक्रममा बोल्दै नयांशक्तिकी महिला नेतृ हिसीला यमीले जनयुद्धमा सबैभन्दा बढी मगर र थारुहरुले योगदान गरेपनि उनीहरुलाई अधिकार नदिएर धोका दिईएको आरोप लगाउनु भयो ।
कार्यक्रममा नयांशक्ति संबद्ध बिभिन्न जनबर्गिय संगठन सहित आदीबासी जनजाती नेताहरुले भेलाको सफलताको शुभकामना ब्यक्त गर्नुभएको थियो ।