काठमाडौं,३० भाद्र । नेपाल कम्युनिष्ट पार्टी नेकपाका अध्यक्ष पुष्पकमल दाहाल ‘प्रचण्ड’ले ठूला ठेकेदारहरुको एकाधिकार तोडेर सबैले समानरुपमा काम गर्न पाउने वातावरण बनाउने बताए ।

नेपाल निर्माण व्यवसायी संगठन एकता घोषणा सभालाई शनिबार काठमाडौंमा सम्बोधन गर्दै उनले कर्मचारीतन्त्र र निर्माण व्यवसायीबीचको अन्तरविरोध समाधानको पहल गर्ने आश्वासन समेत दिएका छन ।

पार्टीको तर्फबाट र सरकारका तर्फबाट पनि कर्मचारी तन्त्रका समस्या, ऐन कानुनका समस्या समाधान गर्नका लागि सकारात्मक ढंगले पहल हुने उनले बताए ।
सरकारको समृद्धिको यात्रामा निर्माण व्यवसायीहरुको भूमिका स्वभावैले गुणात्मक ढंगले बढ्न गएको उनले बताए ।

प्रचण्डले निर्माण व्यवसायीहरुभित्र पनि थुप्रै समस्याहरु रहेको भन्दै त्यसलाई सुधार्न सुझाव दिए । उनले समयमै गुणस्तरीय काम गर्न नेपाल निर्माण व्यवसायी संगठनलाई निर्देशन पनि दिएका छन ।

देशभित्रका निर्माण व्यवसायीलाई सुरक्षित रुपमा काम गर्ने वातावरण सिर्जना नगरेसम्म विदेशी लगानी पनि भित्राउन नसकिने बताउँदै प्रचण्डले सबैभन्दा पहिले सुरक्षामै ध्यान दिइने बताए ।

ठूला कम्पनीहरुको मात्रै एकाधिकार नरहने व्यवस्था गर्ने बताउँदै उनले ‘सबैभन्दा पहिला देशभित्रकै हाम्रै व्यवसायीलाई सुरक्षित गर्ने र केही ठूला ठेकेदार कम्पनीहरुको मोनोपोली (एकाधिकार) लाई तोडेर सबैले समानरुपमा काम गर्ने अवसर प्राप्त गर्ने’ वातावरण सिर्जना गर्ने आश्वासन दिएका छन ।