काठमाडौं १८ वैशाख । सरकारले काठमाडौंको बालाजुस्थित ओग्यन जम्लिङ टेरमा गुम्बामा डोजर चलाउने तयारी गरेपछि बौद्ध धर्माम्बलम्विहरुले आपत्ति जनाएका छन् । 
बुद्धको २५७० औ जन्मजयन्तिको अवसरमा विश्वभर शान्ति र समृद्धिको सन्देश फैल्याउने काम भईरहेका बेला शुक्रवार सरकारले अनधिकृत भन्दै उक्त गुम्बामा डोजर चलाउने सूचना दिएपछि उनीहरुले आक्रोश पोखेका हुन् । उनीहरुले सरकारको उक्त कदमलाई बौद्ध धर्ममाथिको ठाडो प्रहारको रुपमा लिँदै प्रधानमन्त्री बालेन्द्र साहको चर्को आलोचना गरेका छन् । प्रधानमन्त्री साहले आफ्नो शपथ बौद्ध भिक्षुहरुलाई राखेपछि सोही धर्मको आस्थाको केन्द्र गुम्बामा भने डोजर चलाउने काम सह्य नहुने गुम्बाका सञ्चालक उमेश लामाले बताउनु भयो । उहाँले सरकारले बौद्ध धर्ममाथि नै आक्रमण गरेको भन्दै आपत्ति समेत जनाउनु भयो । 
लामाले भन्नुभयो,‘हामी के भन्न चाहन्छौँ भने यो गुम्बा भत्किँदै गर्दा कुनैपनि बौद्धमाथि आक्रमण नहोस् । बौद्ध धर्ममाथि आस्था राख्नेहरुमाथि डोजर नचलोस् । यो गुम्बा भत्किदै गर्दा यसमा सरकारलाई सहजीकरण गर्न हामी तयार छौ । तर के यो गुम्बा फेरि यही अवस्थामा उभिन सक्छ । भन्ने सरकारलाई मेरो प्रश्न छ । यो बौद्ध धर्ममाथिको सरकारको ठाडो प्रहार हो । किनभने हिजो बालेन्द्र साह प्रधानमन्त्री हुँदाखेरी १०७ जना भिक्षुहरु साँची राखेर सपथ खाएर डोङपिटनेहरु आज गुम्बामा डोजर चलाईदैछ । यसमा विचार पु¥याउनु पर्दैन ? यो कुनै पनि अतिक्रमण होइन । यो गुम्बाको नाममा ८ आना जग्गा कब्जा गर्न बौद्ध धर्ममाथि गरिएको आक्रमण हो । यस्तो काम सरकारले नगरोस् ।’ 
करिव ८ आना जग्गामा २०५७ सालमा स्थापना गरिएको सो गुम्बाको हाल १४÷१५ करोड मूल्य पर्ने सो गुम्बा संचालक समितिको अनुमान छ । सञ्चालक समितिका सदस्य लामाले सो गुम्बा सरकार आफ्नै सम्पत्ति भएपनि डोजर आतंक चलाएर सरकारले आफ्नै सम्पती नष्ट गरेको हुने जिकिर गर्नुभयो । साँढे २ तले सो गुम्बाको भवन रहेको छ । त्यसमा डोजर चलाउने प्रयास गरेर सरकारले गुम्बा संरक्षण गर्ने आफ्नो दायित्व समेत बिर्सिएको भन्दै बौद्ध भिक्षुहरुको जिकिर छ । उनीहरुले ती गुम्बाहरुको संरचना भत्काउने कदमको जिम्मेवारी सरकार आफैँले लिनुपर्ने चेतावनी समेत दिएका छन् ।