काठमाडौं, ९ साउन । नेपाल विद्युत प्राधिकरण सिन्धुली वितरण कार्यालयले एकजना गाउँलेलाई विद्युत ट्रान्सफरमर सार्दा घाइते भएपछि अलपत्र छाडेका छन् ।

गत असार ३२ गते सिन्धुलीको कमलामाई नगरपालिका वडा नम्बर ३ चपौलीमा विद्युत ट्रान्सफ्रमर जडानका क्रममा करेन्ट लागी स्थानीय दुर्गा देवकोटा घाइते भएका थिए । घाइतेलाई उपचारका लागि काठमाडौंको कीर्तिपुरस्थित बर्न सेन्टरमा उपचारका लागि ल्याउन विद्युत प्राधिकरण सिन्धुलीले नै सहयोग पनि गर्यो । तर चार दिनपछि प्राधिकरणका कर्मचारी विरामी छाडेर हिडे ।

विद्युतका कर्मचारी एकाएक विरामी छाडेर हिडेपछि देवकोटाका आफन्तहरुले उनको उपचार गरिरहेको छ । विद्युत टान्सफर्मर सार्न खोज्दा करेन्ट लागेपछि प्राधिकरणले पूरा उपचार र क्षतिपूर्ति देला भन्ने अपेक्षा आफन्तको थियो । तर, विरामी नै अलपत्र छाडेर हिडेपछि आफन्तहरु आक्रोसित बनेका छन् ।

बिरामी हलचल गर्न नसक्ने अवस्थामा छ । बिरामीको अवस्था चिन्ताजनक अवस्थामा छ । सुरुमा १५ हजार र पछि १० हजार रुपैया उपचारका लागि भन्दै प्राधिकरणले उपलव्ध गराएको पनि थियो । तर, बिरामीको लागि हेरचाहमा खटाएका कर्मचारी नै सिन्धुलीतिर लागेपछि देवकोटाको उपचारमा समस्या सिर्जना भएको थियो । आफन्तहरुले देवकोटाको उपचारमा हेलचेक्र्याई हुने देखेपछि आफन्तहरु नै अहिले उपचारमा जुटेका छन् । चिकित्सकसित मिलेर बिरामीलाई डिस्चार्ज गराउन समेत लागेको आरोप आफन्तको छ ।

बिरामीको उपचारमा प्राधिकरणले बेवास्ता गरेको जानकारीपछि सिन्धुली ट्रष्ट नेपालका अध्यक्ष उज्वलविक्रम थापा र अभियन्ता तथा पत्रकार डण्ड गुरुङ अस्पताल पुगेको थियो । बिरामीको स्थिति बुझ्नुका साथै आफन्तहरुसित बिरामीको उपचारका बारेमा छलफल भएको छ । घाइते देवकोटाले ट्रान्सफर्मर सार्नका लागि प्राधिकरणका मानिसहरु आएर सहयोग मागेको र आफूले सहयोग गर्न खोज्दा करेन्ट लागेको बताएका छन् । देवकोटाको भुँडी, लिंग लगायत भागमा बढी जलेको छ ।

उता सिन्धुलीस्स्थित एबीसी रिपोर्टर विदुर पौडेलसित कुराकानी गर्दै सिन्धुली प्राधिकरणका प्रमुख खिलनाथ अर्यालले भने देवकोटा आफूखुशी ट्रान्सफर्मर सार्न चढेको बताएका छन् । देवकोटा घाइते भएपछि मानवीय नाताले सहयोग गरेको बताएका छन् । तर, आफन्तहरुले भने घाइतेको उपचारका साथै क्षतिपूर्ति पाउनुपर्ने माग गरेका छन् ।

घाइतेको उपचारका लागि सिन्धुली ट्रष्टले पहल गर्ने भएको छ । त्यसका लागि सरकारसित समन्वय गर्ने र घाइतेको मागबारे सम्वन्धित निकायको ध्यानाकर्षण गराउने ट्रष्टका अध्यक्ष थापाले बताए ।

घाइतेको अवस्था र प्राधिकरण सिन्धुलीको बेवास्ता बारेमा सिन्धुली ट्रष्टका अभियन्ताहरुले उर्जा, जलस्रोत तथा सिचाईमन्त्री वर्षमान पुनको सचिवालयमा जानकारी गराइसकेको छ । मन्त्री पुनको सचिवालयले घाइते देवकोटाको उपचारका लागि तत्काल पहल गर्ने समेत जनाएको छ ।