सप्तरी, ८ साउन । शिक्षा तथा विज्ञान प्रविधि मन्त्री गिरिराजमणी पोखरेलले शिक्षकहरु राजनीति छोडेर पढाउने तर्फ ध्यान केन्द्रित गर्नुपर्ने बताएका छन् ।

शिक्षकहरु आफूलाई राजनैतिक पार्टीको नेता ठानेर राजनीति गर्नतर्फ बढी ध्यान दिएपछि अहिले शिक्षाको गुणस्तर खस्किदै गरेको आरोप समेत लगाए । सप्तरी सदरमुकाम राजविराजमा मंगलबार आयोजित स्थानिय सरकारको जनप्रतिनिधिका लागि शिक्षा सम्बन्धी अन्तरक्रिया कार्यक्रमलाई सम्बोधन गर्दै मन्त्री पोखरेलले सो आरोप लगाएका हुन् ।

शिक्षक कुनै पार्टीसँग आवद्ध हुनुहुदैन, शिक्षकले जे पढाउँछ बालबालिकाले त्यही नै सिक्छ, त्यसैले शिक्षकहरुले राजनीति छोडेर बालबालिकाको भविष्य बनाउने तर्फ ध्यान दिनुपर्ने उनले बताए ।

मन्त्री पोखरेलले शिक्षकहरुलाई पार्टी एवं टे«ड युनियनको छाप हटाई शिक्षा सुधार नीतिमा लाग्न आग्रह समेत गरे । कार्यक्रलाई सम्बोधन गर्दै मन्त्री पोखरेलले सिकाई स्तरलाई माथि उठाउनका लागि स्थानिय तहका विद्यालयहरुमा आ–आफ्नो मातृ भाषामै पढाई हुनुपर्नेमा जोड समेत दिए ।

बालबालिकाले सबैभन्दा पहिला मातृभाषा नै सिक्ने हुनाले विद्यालयमा पनि सोही मातृभाषाको सिकाई आवश्यक रहेको जिकिर गरे । एक अर्को प्रसङ्गमा मन्त्री पोखरेलले अनसनरत डा. गोबिन्द केसीको बारेमा संचारमाध्यमहरुले अनावश्यक ढंगले प्रस्तुत गरेर भ्रम फैलाइरहेको आरोप लगाए ।

जुम्लाबाट काठमाडौं ल्याउने क्रममा सामान्य बल प्रयोगमात्र भएको बताउँदै उनले हुदै नभएको कुरा सञ्चार माध्यममा आएकोप्रति असन्तुष्टी जनाए । उनले केदारभक्त माथेमा आयोगले दिएको प्रतिवेदन अनुसार बनाइएको चिकित्सा शिक्षा अध्यादेशमा सरकारले थोरै परिमार्जन गरेको बताउँदै डा. केसीको सुझावलाई पनि सरकारले समेट्न तयार रहेको जानकारी दिए ।