काठमाडौं, ७ साउन । तीन साताअघि अपरेशन गर्नका लागि आर्थिक अभावमा छट्पटिएकी सिन्धुली तीनकन्या कुभिण्डेकी केशरीमाया मगर अहिले आफै उठ्न सक्ने हुनुभएको छ ।

लडेर घाइते पछाडिको तल्लो भागको हड्डी भाँचिएपछि काठमाडौंस्थित ट्रमा सेन्टरमा भर्ना हुनुभएकी मगरको अपरेशन गर्न खर्च अभाव भएपछि सिन्धुली ट्रष्ट नेपालले ३० हजार रुपैयाँ सहयोग उपलव्ध गराएको थियो ।

सो रकम प्राप्त भएपछि मगरको अपरेशन भएको थियो । अपरेशनपछि उपचाररत मगर अहिले आफै उठ्न सक्ने हुनुभएको छ । सिन्धुली ट्रष्टका अध्यक्ष उज्वल विक्रम थापा र अभियन्ता डण्ड गुरुङ सोमबार मगरलाई भेट्न अस्पताल पुग्नुभएको थियो ।

थापा र गुरुङलाई देख्नासाथ मगर निकै खुशी हुनुभयो । उहाँ आफै उठ्नु भयो र भन्नुभयो “अब म म आफै उठ्नसक्ने भएँ ।” लामो समयदेखि सिन्धुली जिल्लाबासीका लागि सहयोग गर्दै आउनुभएका सिन्धुली ट्रष्टका अध्यक्ष थापा पनि मगरको अवस्था देखेर खुशी हुनुभयो । उहाँले भन्नुभयो “यति चाँडै यो दिदीको अवस्था यति सुधार होला भन्ने लागेको थिएन । उहाँ अहिले बस्नसक्ने हुनुभएको रहेछ, निकै खुशी लाग्यो ।”

ट्रष्टको तर्फबाट उपलव्ध गराएको आर्थिक सहयोगले आमाको उपचारमा महत्वपूर्ण सघाउ पुगेको केशरीमायाका छोरा भुपाल मगरले बताउनुभयो । अझै केही हप्ता अस्पतालमा नै उपचारका लागि राख्नुपर्ने चिकित्सकहरुले बताएका छन् ।