बर्दिया,२ साउन । प्रदेश नं ५ का मुख्यमन्त्री शंकर पोखरेलले प्रदेश सरकारले यस बर्षलाई योजना तर्जुमाको बर्षको रुपमा लिएको बताउनु भएको छ । उहाँले अर्को बर्ष देखि योजना कार्यन्वयनको रुपमा अगाडी बढाउने बताउँदै यस बर्षलाई आधार बर्षका रुपमा अगाडी बढाउने निर्णय गरेको बताउनु भएको हो ।

मुक्तकमैया दिवश मनाउनका लागि बर्दियाको गुलरिया आउनु भएका मुख्यमन्त्री पोखरेलले नेपाल पत्रकार महासंघ जिल्ला शाखा बर्दियाले आयोजना गरेको पत्रकार भेटघाट कार्यक्रममा बोल्दै सो कुरा बताउनु भयो । उहाँले प्रदेश सरकारले यस बर्षमा प्रदेशका नीति नियम र कानुन बनाउनमा खर्च गर्ने र त्यस पछि तिनीहरुको कार्यन्वयन तर्फ अगाडी बढ्ने बताउनु भएको छ ।

कार्यक्रममा बोल्दै मन्त्री पोखरेलले बर्दिया जिल्लालाई नमुना जिल्ला बनाउने बताउनु भएको छ । प्रदेश नं ५ को पश्चिमको प्रवेशद्धाराको रुपमा बर्दिया जिल्ला भएको बताउँदै मुख्यमन्त्री पोखरेलले ५ नं प्रदेशमा प्रवेश गर्दा फरक अनुभुती हुने गरेर बर्दियाको विकास गर्ने बताउनु भयो । मुख्य मन्त्री पोखरेलले प्रदेश नं ५का मुख्य प्रवेशद्धारमा प्रदेश कै पहिचान झल्कने र निगरानी सहितका भव्य गेटहरु निर्माण गर्ने बताउनु भयो ।
कमैया मुक्ती भएको लामो समय सम्म पनि मुक्तकमैयाहरु पुर्नस्थापना हुन नसकेको बताउँदै प्रदेश सरकारले पहिलो पटक मुक्त कमैया दिवस मनाउन थालेको बताउनु भयो । कमैयाबाट मुक्तीको सुरुवात गरी कमलरी हलिया लगाएत सम्पुर्ण प्रकारका बधुँवा मजदुरको मुक्त गरीएको बताउँदै उनीहरुको पुर्नस्थापनाका लागि प्रदेश सरकार अगाडी बढिरहेको बताउनु भयो ।

त्यसैगरी मुख्यमन्त्री शंकर पोखरल सहितको टोलीले निर्माण पश्चात हस्तान्तरण नहुँदै भासिएको जब्दीघाटको पुलको समेत निरिक्षण गर्नु भएको छ । उहाँले पुलले बारबर्दिया र गुलरिया नगरपालिका जोखिममा परेको बताउँदै अख्तियार दुरुपयोग अनुसन्धान आयोगलाई अविलम्ब अनुसन्धान गरी निकाश निकाल्न आग्रह गर्नु भएको छ । मन्त्री पोखरेलले कृष्णसार संरक्षण क्षेत्रको समेत निरिक्षण गर्नु भएको छ ।