काठमाडौं,१३ असार । परराष्ट्र मन्त्री प्रदीप ज्ञवालीले राजदूत नियुक्तिलाई व्यवस्थित, मर्यादित र पारदर्शी बनाउने प्रतिबद्धता व्यक्त गरेका छन ।

प्रतिनिधीसभाको बुधबारको बैठकमा आफ्नो मन्त्रालयको विनियोजन विधेयकमाथिको छलफलमा सांसदका प्रश्नको जवाफ दिदै उनले योग्यता र क्षमताको आधारमा राजदूत नियुक्त गर्ने योजना रहेको बताएका छन ।

ज्ञवालीले नेपालको संविधानले नै नेपालको परराष्ट्र नीति निर्देशित गरेको पनि बताए ।  ज्ञवालीले पारस्परिक हित र मैत्रीपूर्ण सम्बन्धका आधारमा हालै प्रधानमन्त्रीबाट छिमेकी देश भारत र चीनको भ्रमण सम्पन्न गरेकोे जानकारी दिँदै भ्रमणका क्रममा भएका सहमति एवं सम्झौता कार्यान्वयनमा आएको बताएका छन ।

उनले नेपालको सीमा सुरक्षा गर्न सरकार प्रतिबद्ध रहेको स्पष्ट पार्दै नेपाल र भारतबीचका सीमा स्तम्भ मर्मत कार्य जारी रहेको जानकारी दिए । प्रवासमा काम गर्न गएकामध्ये दुर्घटनामा परी विभिन्न देशमा हाल २० जना नेपाली कोमामा रहेका र ३ सय ३५ कारागारमा रहेका जानकारी दिँदै उनले राजदूत नियुक्ति कार्य व्यवस्थित बनाइने जानकारी समेत दिएका छन ।

बैठकमा “संघीय संसद्का महासचिव, प्रतिनिधिसभाका सचिव तथा राष्ट्रियसभाका सचिवको पारिश्रमिक, सेवाको शर्त र सुविधासम्बन्धी विधेयक, २०७५” प्रस्तुत गरिएको छ । कानून, न्याय तथा संसदीय मामिला मन्त्री शेरबहादुर तामाङले उक्त विधेयक बैठकसमक्ष प्रस्तुत गरे ।