काठमाडौ, २१ जेठ । प्रतिनिधिसभाको सोमबारको बैठकमा सांसद कुलदेवी विश्वकर्माले आफु दलित भएकै कारणले काठमाडौंमा कोठा नपाएको गुनासो गरेकी छिन् ।

बैठकमा बोल्दै सांसद विश्वकर्माले दलित भएकै कारण एक महिनादेखि काठमाडौंमा कोठा पाउन नसकेको बताएकी हुन् । उनले भनिन्, ‘मैले सांसद भएपछि काठमाडौँ आएदेखि कोठा खोजेकी छु । तर दलित भएकै कारण पाएको छैन । शिक्षितको बसोबास रहेको भनिएको राजधानीमा त यस्तो छ भने गाउँघरमा कस्तो होला ।’

उनले संसदमा छुवाछुत अन्त्य भएको पटक पटक सुने पनि काठमाडौंमा नै छुवाछुत भोग्नुपरेको बताइन् । राज्यको नीति निर्माण तहमा पुगेर त जातीय विभेदको यस्तो कहर सहनु परेको छ भने सर्वसाधारण दलित नागरिकको अवस्था कस्तो होला भनेर उनले संसदमा प्रश्न गरेकी छन् ।

उनले भनिन्, ‘हामीले गाउँमा होटल तथा अरु सर्वाजनिक ठाउँमा पनि आफूले खाएको भाँडा पनि माझ्नु पर्ने अवस्था छ । हाम्रो भन्दा अझ सर्वसाधारण नागरिकको अवस्था झन दयनीय छ ।’

उनले दलित भन्ने शब्द नै हटाउन आग्रह गरिन् । ‘हामी दलित होइनौं शिल्पी हौं’ विश्वकर्माले भनिन् ।