पोखरा, ८ जेठ । प्रहरीले प्रक्राउ गरेका एक व्यक्ति पोखरामा हतकडीसहित भागेका छन् । पोखरा –५, प्रस्याङमा सोमबार राति केही व्यक्तिहरुबीच झगडा भएपछि प्रहरी घटनास्थलमा पुगेको थियो । प्रहरीले झगडामा संलग्नलाई हतकडी लगाएकोमा एक जना भने हतकडीसहित भागेका हुन् ।

वडा प्रहरी कार्यालय बैदामका डीएसपी नवीन कार्कीले जानकारी दिए अनुसार हतकडीसहित भाग्नेमा स्थानीय राजकुमार परियार छन्।

प्रहरीले उनको खोजी गरिरहे पनि भेटाउन सकेको छैन । आफ्नै घरमा तोडफोड गरिरहेका उनलाई स्थानीयको सूचना पाएपछि पुगेको प्रहरीले हतकडी लगाएको थियो ।

प्रहरीको संख्या कम भएका कारण झगडियाहरु भागेको हुनसक्ने कास्की प्रहरी प्रवक्ता खड्कबहादुर खत्रीले बताए । ‘रक्सी खाएको मान्छे समाउन धेरै प्रहरी चाहिँदैन भनेर थोरै मात्रै गएका थिए । हतकडी लगाएपछि प्रहरीलाई नै झुक्याएर भागे’, उनले भने, ‘भाग्नेहरुको खोजी भैरहेको छ । पक्राउ गरेर कारबाही गर्छौं ।’

वडा प्रहरी कार्यालय बैदामले एक जना मात्रै हतकडीसहित भागेको जनाएको छ भने स्थानीयले चाहिँ अन्य केही व्यक्तिहरु पनि प्रहरीको गाडीमा चढाइसकेपछि हाम फालेर भागेको बताएका छन् ।

त्यस क्षेत्रमा प्रहरी परिचालन गरी भाग्नेहरुको खोजी भइरहेको जिल्ला प्रहरी कार्यालय कास्कीले जनाएको छ ।