काठमाडौं, १९ वैशाख । त्रिभुवन विमानस्थलबाट भएको ३३ किलो सुन तस्करी प्रकरणमा बयान दिन मोरङ पुगेका नेपाल प्रहरीका एसएसपी दिवेश लोहनीलाई जिल्ला प्रहरी कार्यालय मोरङले नियन्त्रणमा लिएको छ । बयान दिन पुगेका लोहनीलाई प्रहरी कार्यालय मोरङले पक्राउ पूर्जी थमाउँदै नियन्त्रणमा लिएको हो।

उनले ३३ केजी सुन प्रकरणको अनुसन्धान गरिरहेको थिए । तर अनुसन्धानका क्रममा लोहनीमाथि नै शंका भएपछि गृह मन्त्रालयको निर्देशन बमोजिम प्रहरी प्रधान कार्यालय नक्सालले चैत २२ गते उनलाई जिम्मेवारीबाट मुक्त भएको पत्र थमाएको थियो।

उनीसँगै अनुसन्धानमा खटिएका डिएसपी प्रजित केसी र बालकृष्ण सञ्जेल पनि जिम्मेवारीमुक्त भएका छन्। डिएसपी केसी र सञ्जेललाई छानबिन समितिले नियन्त्रणमा लिई अनुसन्धान गरिरहेको छ।

सरकारले गठन गरेको उच्चस्तरीय छानविन समितिले यहि घटनामा यसअघिसम्म ६ जना प्रहरी नियन्त्रणमा लिई अनुसन्धान गरिरहेको छ।

माघको पहिलो साता सुन त्रिभुवन विमानस्थल हुँदै बाहिरिएको थियो । सो सुन हराएपछि गिरोह भित्रै विवाद सिर्जना भएको थियो । सोहि घटनामा तीन जनाको ज्यान गएको छ । व्यापारी सनम शाक्यको हत्यापछि घटनाले चर्चा पाएको हो । शाक्यको परिवारले सुन तस्करीमा उच्चस्तरीय व्यक्तिहरुको पनि संलग्नता भएको भन्दै छानबिन गरि पाउ भन्ने निवेदन दिएपछि मन्त्रीपरिषद्को बैठकले अनुसन्धानका लागि उच्चस्तरीय छानविन समिति गठन गरेको थियो ।

त्यसपछि धेरै तथ्यहरु बाहिर आएको छ । अनुसन्धानको टोलीले सुन तस्करीमा ठुलो गिरोह सक्रिय रहेको, जसमा चर्चित व्यापारी, नेता, उच्च तहमा बसेका प्रहरी, साथै विमानस्थलका कर्मचारीको मिलेमतोमा सुन तस्करी हुने गरेको खुलासा भएको छ । प्रहरीले घटनामा संलग्न ६३ जनालाई पक्राउ गरिसकेको छ । साथै सुन तस्करीका मुख्य योजनाकार चुडामणि उप्रेती ‘गोरे’ माथि रेडकर्नर नोटिस जारी भएको छ।