काठमाडौं, – प्रगतिशील लोकतान्त्रिक पार्टी (प्रलोपा) ले पार्टीका पूर्व संरक्षक तथा पूर्व प्रधानमन्त्री डा. बाबुराम भट्टराईले नेतृत्वमाथि गरेको टिप्पणीप्रति गम्भीर आपत्ति जनाउँदै खेद व्यक्त गरेको छ ।

जेठ १६ र १७ गते बसेको सचिवालयको विस्तारित बैठकले डा. भट्टराईका सार्वजनिक अभिव्यक्तिलाई ‘अराजनीतिक एवम् स्तरहीन’ ठहर गर्दै खेद प्रस्ताव पारित गरेको हो। पार्टी अध्यक्ष सन्तोष परियारद्वारा जारी विज्ञप्तिमा भनिएको छ, “डा. बाबुराम भट्टराईले आफू सांगठनिक कार्यमा सहभागी नहुने जानकारी गराएपछि पार्टीले ससम्मान बिदाइ गरेको थियो। तर, आफू संलग्न नरहेको पार्टी नेतृत्वमाथि गरिएको अराजनीतिक टिप्पणीप्रति हामी दु:ख व्यक्त गर्दछौँ।”

चुनावी पराजयपछि आन्तरिक किचलोमा फसेको प्रलोपामा केही समयअघि सुदन किराती, दुर्गा सोव र ओजस्वी भट्टराईले जिम्मेवारी छोडेपछि सन्तोष परियार एकल अध्यक्षमा चुनिएका थिए। परियारको उक्त चयनलाई डा. भट्टराईले सार्वजनिक रूपमा ‘किर्ते’ र ‘ठगी’ को संज्ञा दिएपछि दुई पक्षबीच विवाद उत्कर्षमा पुगेको हो।

प्रधानमन्त्री बालेन्द्र साहको अभिव्यक्तिमाथि पनि असन्तुष्टि यसैगरी, पार्टीले प्रधानमन्त्री बालेन्द्र साहको पछिल्लो सीमासम्बन्धी अभिव्यक्तिप्रति पनि गम्भीर आपत्ति जनाएको छ। राष्ट्रिय महत्त्वका संवेदनशील विषयमा प्रधानमन्त्रीले दिएको अभिव्यक्ति गैरजिम्मेवार रहेको भन्दै पार्टीले खेद व्यक्त गरेको छ।

वामपन्थी शक्तिसँग ध्रुवीकरणको पहल आन्तरिक विवाद र चुनावी असफलताबाट पाठ सिक्दै प्रलोपाले अब विभिन्न वामपन्थी तथा प्रगतिशील शक्तिहरूसँग एकता र ध्रुवीकरणका लागि पहल गर्ने निर्णय गरेको छ। सो प्रयोजनका लागि अध्यक्ष सन्तोष परियारको नेतृत्वमा जनार्दन शर्मा, राम कार्की, डा. जनक शाह, कृष्णा केसी र जटिल कार्की सम्मिलित ‘राजनीतिक संवाद समिति’ गठन गरिएको छ।